Almaty ákimi Erbolat Dosaev Bostandyq aýdanynyń turǵyndarymen kezdesýde jol-kólik ınfraqurylymyn jańartý jáne jolaýshylar tasymaly sapasyn arttyrý boıynsha júrgizilip jatqan jumystar týraly aıtty, dep habarlaıdy aqshamnews.kz
Qala basshysynyń aıtýynsha, byltyr aýdanda 33 kóshede 30,5 km jol ortasha jóndeýden ótti. Bıyl taǵy 26 kóshede 30,3 km jol jóndeledi.
Sonymen qatar, aǵymdaǵy jóndeý jumystary aıasynda 30 myń sharshy metr jol tósemi qalpyna keltirilip, 32 km aryq júıesi salyndy. 2025 jyly taǵy 30 myń sharshy metr joldy jóndeý jáne 24,4 km aryq júıesin salý josparlanǵan.
«Inklúzıvti ortany qurý maqsatynda bıyl mamyr aıynda 5 jerústi jáne 12 jerasty jaıaý júrginshiler ótkeline kúrdeli jóndeý júrgiziledi. Jóndeý barysynda jedelsatylar men kótergish qurylǵylar jańartylady. Jumys jyl sońyna deıin aıaqtalady», – dedi Erbolat Dosaev.
Kezdesý barysynda Almaty ákimi aýdanda qoǵamdyq kólik qyzmetiniń sapasyn arttyrý boıynsha atqarylyp jatqan jumystar týraly da habarlady. Ótken jyly qoǵamdyq kólik parki 66 jańa avtobýspen tolyqty, bul 25 qoldanystaǵy marshrýtty jańartýǵa jáne qosymsha avtobýs qosýǵa múmkindik berdi. 2025 jyldyń mamyr aıynda taǵy 18 jańa avtobýs 8 marshrýtqa qosylady.
Buǵan qosa, aýdanda tártip pen qaýipsizdikti qamtamasyz etý maqsatynda 2024 jyly 26 «Sergek» aparattyq-baǵdarlamalyq kesheni jáne 1 100 beınebaqylaý kamerasy ornatyldy.