EO-nyń Reseıge qarsy sanksıalary Qazaqstannyń Eýropamen bıznesine áser etpeıdi. Belgıa elderdiń saýda yntymaqtastyǵyn qoldaý sharalaryn belgileýge, sondaı-aq qamtamasyz etý úshin kómektesýge daıyn.
Bul týraly Brússeldiń Saýda-ónerkásip palatasynyń tóraǵasy Olıve Vılloks elimizdiń Saýda jáne ıntegrasıa vıse-mınıstri Qaırat Tórebaevpen kezdesýden keıin málim etti, dep habarlaıdy Almaty-akshamy.kz
Qazaqstannyń úkimettik delegasıasy Belgıanyń Eksportty yntalandyrý agenttiginiń basshylyǵymen ózara tıimdi seriktestik boıynsha birlesken sharalardy talqylady.
«Ótken jyly Qazaqstan men Eýropa arasyndaǵy taýaraınalym 21% ósip, 28,9 mlrd dollardy qurady. Eýropa naryǵyna jyl saıyn 200 mln dollarǵa jetkize alatyn 53 túrli ónimdi suryptap aldyq. Bul – eń aldymen qaıta óńdeý, aýyl sharýashylyǵy ónimderi, farmasevtıka, mashına jasaý. Basty mindetimiz – daıyn ónimdi alǵa jyljytý. Shıkizat jaǵynan barlyǵy jaqsy. Biz EO-ǵa munaı jetkizemiz, osy odaqtyń qazaqstandyq qara altyndy satyp alýynda eshqandaı kedergi kórip turǵan joqpyz. Sanksıalyq rejımde Qazaqstan – qaqtyǵys taraptarynyń biri emes, sondyqtan biz aımaqtyq jáne halyqaralyq sıpattaǵy barlyq mindettemeni oryndaımyz. Bizdiń mindetimiz –saýdanyń qarqyndy ósýin qamtamasyz etý», - dedi QR Saýda jáne ıntegrasıa vıse-mınıstri Qaırat Tórebaev.
«Qazaqstanmen yntymaqtastyǵymyzdy keńeıtip jatyrmyz. Ásirese, pandemıadan keıingi kezeńde kóbirek kúsh salýymyz kerek, óıtkeni osy ýaqytta saıahattaý múmkindigi shekteldi», - dedi Brússeldiń Saýda-ónerkásip palatasynyń tóraǵasy Olıve Vılloks.