Reseıde qazaqstandyq joǵary jáne joǵary oqý ornynan keıingi bilim berý uıymdarynyń fılıaldary ashylady
Uzaq merzimdi yntymaqtastyq ornatý jáne bilim berý sapasyn qamtamasyz etý, tehnıkalyq baǵyttaǵy kadrlardy daıarlaý maqsatynda Qazaqstan Respýblıkasynyń Úkimeti men Reseı Federasıasynyń Úkimeti arasynda Reseıde Qazaqstannyń joǵary jáne joǵary oqý ornynan keıingi bilim berý uıymdarynyń fılıaldaryn jáne Qazaqstanda Reseıdiń joǵary bilim beretin bilim berý uıymdarynyń fılıaldaryn qurý jáne olardyń jumys isteýi týraly kelisimge qol qoıý týraly qaýly qabyldandy, dep habarlaıdy Almaty-akshamy.kz Elorda.kz-ke silteme jasap.
Kelisimde eki eldiń zańnamasyna sáıkes teń negizdegi fılıaldar qurylatyny kózdelgen.
Kelisimdi iske asyrý aıasynda fılıaldardy ashý kezinde qosarlanǵan lısenzıa alý júzege asyrylady.
Oqytý bilim berý baǵdarlamalary sheńberinde fılıaldar ornalasqan eldiń tili men tarıhyn mindetti túrde meńgerý arqyly eki eldiń memlekettik tilderinde júrgizilýi múmkin.
Fılıaldarda memlekettik baqylaý jáne akredıtteý Qazaqstan jáne Reseı zańnamasyna sáıkes iske asyrylatyn bolady.