Mamandar youtobe jelisinde qazaqstandyq aýdıtorıa arasynda eń kóp qaralym jınaıtyn beınerolıkter qazaq tilinde ekenin alǵa tartyp otyr.
Youtobe statısıkasy boıynsha, 13 mıllıon qazaqstandyq bir aıda 1 mıllıardtan asa beınerolık kóredi, dep habarlaıdy Almaty-akshamy.kz 24.kz-ke silteme jasap.
«Youtobe-tiń statısıkasy boıynsha, 13 mıllıon qazaqstandyq bir aıda 1 mıllıardtan asa beınerolık kóredi. Olardyń basym bóligi - jergilikti avtorlardyń týyndylary. 600 mıllıon qazaqstandyq beınerolıktiń 60%-y - qazaq tilinde. Shyn aıtsam, bul qýantarlyq kórsetkish», - deıdi Genesis Youtube Central Asia dırektory Samson Bezmátejnyı.
Kıno salasynda da qazaqtildi kontentke suranys artty. Biraq suranysqa usynys saı emes. Memleket qarjy bólip, otandyq kınoındýstrıaǵa barynsha qoldaý kórsetýi tıis deıdi kózi qaraqty kórermen. Ári olar balalar úshin usynylatyn qazaq tilindegi múltfılmder joqtyń qasy ekenin aıtýda.
«Qazaqsha mýltıkter az. Óte az. Sapaly mýltıkter bolsa, jaqsy bolar edi. Oryssha kóredi. Noýtbýk, telefonnan qosyp berseń de, birden Nastá, Nıkıta degenderdi kóredi. Kóp balalar solardy kóredi», - deıdi kórermender.
«Ókinishke qaraı, qazir balalar tek oryssha nemese aǵylshynsha múltfılmder kóredi. Qazaqsha qosyp bersek, qyzyq emes deıdi. Sondyqtan mán-maǵynasy bar, kóńilin aýdaratyn, qyzyqty múltfılmderdi kóbirek túsirý kerek dep oılaımyn», - deıdi taǵy bir kórermen.
Al sarapshylar, másele qarjyda emes ekenin qadap aıtty. Jyl saıyn otandyq kıno salasyn damytý úshin kem degende 5-6 mlrd teńge bólinedi eken. "Biraq ol qarajatty maqsatty paıdalana otyryp, qazaq tilinde sapaly fılm túsiretin mamandar ázirge joq", – deıdi Mádenıet jáne sport mınıstrliginiń ókilderi.
Qazaqtildi kontenttiń tapshylyǵy óskeleń urpaqtyń tiliniń tazalyǵyna áserin tıgizip otyrǵany óz aldyna úlken másele. Qatpaǵan sanany «qara ekrannyń» qalyptastyryp jatqan jaıy bar. Sheteldik múltfılmderdi qazaqsha sóıletken dýbláj akteri Aıgúl Imanbaeva osylaı deıdi.
«Biz urpaq tárbıeleımiz desek, álemdik deńgeıdegi suranysqa ıe kıno, múltfılmderdi qazaq tilinde qazaq balasyna usyný kerek. El bolamyn deseń, besigińdi túze. Qansha múltfılmderdi dybystaýǵa qatysyp, ishinde júrsem de, premeralaryn ózim baryp kóremin. Qanshama ata-ana balalaryn ertip keledi? Qazaq tilin bilmeıtin qansha bala keledi, bilse de, shala biletin keledi. Al shyqqan kezde qyzyǵyp, sol múltfılmdegi prıkoldaryn aıtyp, qyzyq-qyzyq oqıǵalaryn aıtyp, oınap kele jatady. Mine, tárbıe osydan bastalady. Balaǵa kúnde maqal-mátel aıtyp otyratyn zaman emes», - deıdi dýbláj akteri Aıgúl Imanbaeva.
Búginde Májiliste qazaq tilin damytýǵa baǵyttalǵan zań jobasy qarastyrylyp jatyr. Onyń normalaryna sáıkes, sapaly ári qyzyqty fılmder qazaqtildi qaýymǵa usynylýy tıis. Jaýaptylar joba iske asyrylsa, kóp shara atqarylady dep sendirip otyr.