Anımasıa kómegimen qazaq jaýyngerlerin «tiriltken» mýltıplıkator tarıh pen ónerdi nasıhattaǵysy keledi.
Mýltıplıkator Gleb Ponomarev Talǵat Tileýjanovtyń «Ábilqaıyr» kartınasyn negizge ala otyryp, beınebaıan jasaǵan, dep habarlaıdy Almaty-akshamy.kz
Mýltıplıkator qazir jastardyń sýret kórmelerine bara bermeıtinin aıtýda. Esesine bári áleýmettik jelini qoldanady. Sol sebepti de osy format arqyly ol tarıh pen ónerdi nasıhattaýǵa úles qosýdy kózdegen.
Mýltıplıkator úshin mundaı aýqymdy kartınaǵa «jan bitirý» ońaı bolmaǵan. Bul óte yjdaǵattylyqty qajet etetin jumys. Gleb onda beınelengen árbir keıipkerden bastap, kıim-keshegi men saýyt-saımanyna deıin basa mán bergen. Oǵan qosa, tabıǵatqa da jan bitiredi. Sonyń bárin 100 betke bólip, árqaısysyn qolmen óńdep shyqqan. Nátıjesinde baıraq jelbirep, jylqylar kisinep, kún kúrkirep, bult jóńkigen kórinis paıda boldy. Ol basty kartına retinde Talǵat Tileýjanovtyń «Ábilqaıyr» kartınasymen jumys istegen. Vıdeo tolyq bolý úshin Esenǵalı Sadyrbaevtyń «Dala» sýretin de qoldandy.
«Bul bizdiń tarıhymyz emes pe? Óz basym sýretti alǵash kórgende onyń atmosferasyna tańǵaldym. Onda sarbazdardyń Ańyraqaı shaıqasyna kirer aldyndaǵy daıyndyǵy beınelengen. Sýrette jaýyngerlerdiń júzi qatal, susty etip salynǵan. Osy emosıany basqalarǵa jetkizgim keldi. Jalpy, bári úılesimdi bolyp shyqty. Túsine ózgeris engizip, anımasıa jasadym», - deıdi mýltıplıkator Gleb Ponomarev.
Bul mýltıplıkatordyń kartınalarǵa jan bitirgen alǵashqy jumysy emes. Osy baǵytta jasalǵan birneshe eńbegi bar. Ol qoly bos ýaqytynda osyndaı erekshe vıdeolar jasaýmen aınalysady. Ponomarev tarıhı týyndylardyń buqaralyq aqparat quraldarynda, kınoda jáne áleýmettik jelilerde kóbirek bolǵanyn qalaıdy.