Rahymjan Qoshqarbaev. Kókiregimizde erekshe kóńil men maqtanysh sezimin uıalatatyn osy bir esimdi bilmeıtin qazaq, osy batyrdyń erligin qaıtalaýdy armandamaıtyn jas urpaq joq bolar, sirá. Óıtkeni, Raqymjan erligi – eriksiz bas ıdiretin eren erlik.
Raqymjan Qoshqarbaev 1924 jyly 19 qazanda Aqmola oblysy Aqmola aýdanynda dúnıege kelgen. 1942 jyly áskerge alynyp, 1944 jyly Frýnzedegi (Bishkek) jaıaý ásker ýchılıshesin bitirgen. 1944 jyly qazan aıynan bastap I Belorýs maıdanyndaǵy 150-Idrısk atqyshtar dıvızıasy quramynda vzvod basqaryp, Polsha jáne Germanıa jerlerindegi urystarǵa qatysty. Leıtenant Qoshqarbaev Berlın operasıasy kezinde asqan erlik kórsetti. 30-sáýirde ol jaýynger Grıgorıı Býlatov ekeýi keńes áskerleri arasynan Reıhstagqa aldymen jetip, jeńis týyn tikti. Soǵystan keıingi jyldary Elba boıyndaǵy keńestik okýpasıalyq ásker bóliminde qyzmet atqardy.
R.Qoshqarbaevtyń maıdandaǵy soǵystarǵa qatysýy merzimdi baspasózde jáne kórkem ádebıette jan-jaqty jazyldy. Berlınniń ózinde bolǵan soǵystarda ol óziniń vzvodymen eń aldyńǵy shepterde boldy. Koról alańyna – «Gıtlerdiń úıine» birinshi bolyp jetti. I dárejeli «Uly Otan soǵysy» ordenimen marapattaldy. Oder ózeninen ótýdegi qandy shaıqastan keıin ony partıa músheligine qabyldady. Al partıa bıleti asa mańyzdy bekinisti jáne saıası mańyzdy maqsatqa jetýdiń madaqtaý belgisi retinde «Gıtlerdiń úıinde» tabys etildi. Osynda «Gıtlerdiń úıinde» barlaý vzvodynyń komandıri, leıtenant Qoshqarbaevqa Reıhstagqa Qyzyl týdy tigý týraly tarıhı jaýyngerlik buıryq berildi. Jalaýdy oǵan batalón komandıri Davydov jáne saıası jetekshi Vasılchenko tabys etti. «Gıtler úıi» men Reıhstagka deıin araqashyqtyq 360 metr ǵana, biraq ol jan-jaǵynan oq jaýdyrylǵan ashyq alań ústinde edi. Leıtenant Qoshqarbaev óziniń jaýyngerlerimen bul qandy metrlerdi tolassyz atylǵan oqtyń astynda 7 saǵatta, jerge jabysa eńbekteýmen ótti. Reıhstagqa ol Grıgorıı Býlatov degen soldatpen birge jetti jáne buıryqty oryndap, Reıhstagtyń frontonyna týdy tikti. Bul sáýirdiń 30-y kúni 18 saǵat 30 mınýtta bolǵan edi. Tarıhı erlik jaıyndaǵy bul habar búkil áskerı bólimderdi sharlady, baspasózde keńinen habarlandy.
Ol «Qyzyl Tý», I dárejeli «Otan soǵysy» ordenderimen, kóptegen medaldarmen marapattalǵan. Halyq qaharmany ataǵy R.Qoshqarbaevqa 2001 jyly berildi. Ózi 1988 jyly 10 tamyzda Almaty qalasynda dúnıeden ozǵan.
Ázirlegen Aınur SENBAEVA.