Almaty qalasy mádenıet basqarmasynyń bastaýymen «Rýhanı jańǵyrý» baǵdarlamasy aıasynda «Kıeli joldyń ıesi – Raıymbek...» kitabynyń tusaýkeser rásimi ótti. Atalmysh is-sharaǵa qoǵam qaıratkerleri, Jazýshylar odaǵynyń músheleri, qazaq óneriniń maıtalmandary qatysty.
«Qazaq eliniń azattyǵy jolynda kúresip, kózi tirisinde qol bastaǵan batyr, áýlıe atanǵanǵan babamyzdyń erligi máńgilik el esinde saqtalatyny sózsiz. Bahadúr babamyz jaıly ańyz áńgimelerdi tizbektep aıtsaq, búgin bitpespiz. Degenmen el qulaǵyna áli jete qoımaǵan oqıǵalaryn biri bilse, endi biri bile qoımas. Osy oqylyqtardyń ornyn toltyrý maqsatyNda erekshe kitaptY 1000 danamen jaryqqa shyǵardyq. Kitapqa demeýshilik bildirgen jandarǵa, jazýshylarymyzǵa úlken alǵysymdy bildiremin. Bul kitap – ultymyzdyń ózin-ózi tanyp-bilip baǵalaýynyń ıgi bastamasy bolmaq», – deıdi «Almaty qalasy múzeıler birlestiginiń» KMQK dırektory Ánýar Úmbetalıev.
Kúreske toly ómirinde 77 jerden aýyr dene jaraqatyn alyp, ataqty Oırantóbe shaıqasynda qalmaqtyń 17 batyryn oısyrata jeńgen bahadúrdiń kóripkeldiligi, áýlıeligi bolǵan. «Esimi uran bolyp, sý jol bergen saıypqyran Raıymbek batyr týraly 1999 jyly estip, keıin ol jaıynda tanymym keńeıdi. Sol kezderi qatty kúızeliske ushyrap, ózimdi jaısyz sezinip, sergeldeńge túsken edim. Bir tanysymnyń nusqaýymen batyrdyń basyna baryp Quran baǵyshtaǵanymda, túsime túıe jetektegen áýlıe enip, bolashaǵymnyń jarqyn bolatynyn eskertti. Keıinnen 22 jyldan keıin taǵy da sol atam túsime enip, batyrdyń basyna barǵan edim. Osylaısha mádenıet basqarmasymen birlesip, 3 jyl jaryqqa shyǵa qoımaǵan kitapty 2 aıdyń ishinde basyp shyǵardyq», – deıdi "Aı-prodakshn" JSHS jetekshisi Aınur Aralbaıqyzy.
Kitap Raıymbek Túkeuly týraly zertteýler, esseler men maqalalar, el aýzynda júrgen ańyzdar hám jyr-dastandar, belgili aqyndardyń arnaý óleńderi, bahadúr babaǵa qatysty fotosýretter toptastyrylǵan úsh bólimnen turady. ASPAN baspasynan shyǵarylǵan tanymdyq basylym arnaýly jáne joǵary oqý oryndarynyń stýdentterine, mektep oqýshylary men qalyń oqyrman qaýymǵa jol tartpaq.
«Raıymbektiń kórkem beınesi arqyly halqymyzdyń rýlyq sanadan ulttyq sanaǵa ótken sheshýshi kezeńderi sýrettelgen. Elimizdiń eń iri megapolısi, ǵylym men mádenıet oshaǵy Almaty qalasynda batyrdyń kesenesi boı túzep, halqymyzdyń jasampaz rýhyn asqaqatatqan edi. Endi osy kitap arqyly ótkenimizdi túgendep, keleshegimizdi kemeldeıtinimizge senemin», – deıdi Jazýshylar odaǵy basqarma tóraǵasynyń orynbasary Baqyt Bedelhan.
Batyr babamyzdyń qaıratkerligine arnalǵan mura jas urpaqtyń sana-sezimin arttyryp, ulttyq rýhty asqaqtatary anyq.