Qazaqstan óz Táýelsizdiginiń 30 jyly ishinde údemeli jáne jasampaz damý baǵytymen senimdi alǵa júrip keledi. Egemen memleketti qurý jáne onyń bolashaǵyna degen senim – mine, Qazaqstannyń Tuńǵysh Prezıdenti – Elbasy Nursultan Nazarbaev 1990 jyldary qalaǵan negiz jáne ony búginde Memleket basshysy Qasym-Jomart Toqaev senimdi túrde jalǵastyryp keledi.
Nursultan Nazarbaevtyń táýelsizdik tańynda qabyldaǵan sheshimderi jas memleketke Keńes Odaǵy ydyraǵannan keıingi alǵashqy jyldardaǵy qıynshylyqtardy sátti eńserýge kómektesti. Tuńǵysh Prezıdenttiń paıymy eldiń egemendi ekonomıkasyn, ishki jáne syrtqy saıasatyn qalyptastyrýdyń negizine aınaldy.
Onyń reformalary ótkenin qasterleıtin, ishki turaqtylyǵyn saqtaıtyn jáne qarqyndy damyp kele jatqan jańa Qazaqstandy, sondaı-aq bilimdi, talantty, kreatıvti, óziniń álemdegi biregeı ornyn sezinetin zamanaýı qazaqstandyq ultty qurýǵa múmkindik berdi.
Osy jyldar ishinde Elbasy saıasatynyń basty jolserigi qazirgi kezeńde Tuńǵysh Prezıdent baǵytynyń sabaqtastyǵy, ózi ázirlegen jas táýelsiz memlekettiń uzaqmerzimdi damý strategıasyn iske asyrýdyń saıası kepili sanalatyn «Nur Otan» partıasy boldy. Partıa qyzmeti árdaıym birlik pen turaqtylyq, qazaqstandyqtardyń ómir súrý sapasyn arttyrý isinde sheshýshi ról atqardy.
Táýelsizdiktiń 30 jyly ishinde aqyldy, talapker jáne erkin oılaıtyn adamdardyń tutas býyny ósip-jetildi. Olardyń keıbireýleri óz balalaryn tárbıelep, ózderiniń tabys tarıhyn quryp, eldiń damýyna jeke úlesterin qosyp úlgerdi.
Alaıda osy jyldar ishinde memlekettiń negizgi qaǵıdattary ózgergen joq, bul – adamnyń áleýmettik ál-aýqatyna qamqorlyq jasaý, jeke basty qurmetteý, tıimdi ekonomıkalyq saıasat. Bul qundylyqtar barlyǵyna túsinikti jáne árkimge jaqyn.
Elbasy atap ótkendeı: «Nur Otan» partıasynyń róli – halyqpen birge bolý, onyń armanyn bilý, halyqtyń nıetin bılikke jetkizý, bılikti halyqqa qamqorlyq jasaýǵa májbúrlep, onyń birde-bir ótinishin eskerýsiz qaldyrmaý».
Saılaýshylar aldyndaǵy, búkil qoǵam aldyndaǵy jaýapkershilik bizdiń qyzmetimizdiń aıqyndaýshy qaǵıdaty. Biz olar úshin jáne olarmen birge qabyldanatyn azamattardyń basym kópshiliginiń múddelerin qozǵaı otyryp, el aldynda turǵan mindetterdi iske asyrýǵa daıynbyz.
Prezıdentimiz Qasym-Jomart Toqaev Qazaqstan halqyna Joldaýynda «Bizdiń baǵytymyz berik, maqsatymyz aıqyn. Biz oǵan jetý úshin ne isteý keregin bilemiz. Biz josparymyzdy dáıektilikpen iske asyryp, barlyq bastamalarymyzdy sońyna deıin jetkizemiz. Biz kez kelgen synaqtar men qıyndyqtarǵa daıynbyz», – dep aıtyp ótti.
Árıne, Elbasy – Nur Otan partıasynyń Tóraǵasy Nursultan Nazarbaev saıasatynyń sabaqtastyǵyn jan-jaqty qamtamasyz etý arqyly ǵana osy maqsattarǵa qol jetkizýge, syn-qaterler men qıyndyqtardy jeńýge bolatyny sózsiz.
Partıa isteriniń nátıjeleri, josparlarymyzdy iske asyrýdyń tıimdiligi Almatynyń údemeli damýynan aıqyn kórinedi.
Elimizdiń iri megapolısindegi óz jumysynda «Nur Otan» partıasy bizdiń barlyq azamattarymyzdy tolǵandyratyn asa mańyzdy máselelerdi sheshý joldaryn usyna aldy. Qarapaıym, turmystyq máselelerden bastap edáýir aýqymdy máselelerdi sheshý úshin úlken resýrstardy shoǵyrlandyrý qajet.
Jalpy, bizdiń strategıalyq qujattarymyz, eń aldymen partıanyń saılaýaldy baǵdarlamasy naqty ómirdiń synaǵynan óte bildi dep sanaımyn.
Biz jańa COVID-19 pandemıasymen alǵash ret betpe-bet ushyrasqan kezde baǵdarlama óziniń qajettiligin erekshe dáleldedi. «Nur Otan» partıasy ózin-ózi iske asyrýǵa emes, dereý óziniń barlyq kúshi men resýrstaryn adamdarǵa kómektesýge baǵyttady. Biz pandemıadan qatty zardap shekken aımaqtardaǵy qyzmetti tez arada túzetip, azamattar men bıznesti qoldaý boıynsha óz usynystarymyzdy Úkimetke jiberdik.
Koronavırýs ınfeksıasy medısına men densaýlyq saqtaýdy damytýdyń qanshalyqty mańyzdy ekenin kórsetti.
ÓMİRDİŃ JAŃA SAPASY
Sapaly medısınalyq qyzmet kórsetý jáne densaýlyq saqtaý obektilerine qoljetimdilikti qamtamasyz etý – koronavırýs ınfeksıasyna qarsy kúres jaǵdaıynda biz úshin basym mindettiń biri.
Buǵan qol jetkizý úshin birinshi kezekte densaýlyq saqtaý ınfraqurylymyn kúsheıtý qajet boldy. Sońǵy eki jylda pandemıaǵa qaramastan, eki modýldi aýrýhana men juqpaly aýrýlar aýrýhanasynyń fılıaly salyndy. Qalanyń 16 iri stasıonarynda ottegi stansalary ornatyldy. Káriz sýlaryn zararsyzdandyrý jáne medısınalyq qaldyqtardy kádege jaratý júıeleri jańǵyrtyldy. Aǵymdaǵy jyly biz №6 qalalyq emhanany, sondaı-aq aýdanaralyq týberkýlezge qarsy dıspanserdi kúrdeli jóndeý jáne seısmıkalyq kúsheıtý jumystaryn aıaqtaý esebinen ınfraqurylymdy kúsheıtý mindetin oryndadyq.
Budan basqa, COVID-19 pandemıasyna qarsy is-qımyl sheńberinde jedel járdemdi baǵyttaýdyń jańa modelin engizý, negizgi klınıkalyq-dıagnostıkalyq baǵyttar boıynsha bas shtattan tys mamandar ınstıtýtyn, qalanyń barlyq jansaqtaý bólimshesin baqylaý úshin jedel den qoıý reanımasıalyq tobyn qurý esebinen densaýlyq saqtaý júıesiniń jumysy kúsheıtildi. Medısınalyq preparattar qoryn qamtamasyz etý úshin dári-dármekterdiń turaqtandyrý qory, táýlik boıy jumys isteıtin Pasıentterdi baqylaý ortalyǵy jáne Telemedısına ortalyǵy jedel quryldy.
Sapaly bilimge qoljetimdilikti qamtamasyz etý de mańyzdy. Mundaǵy basty mindet – megapolıste mektepke deıingi jáne oqýshy oryndarynyń tapshylyǵy máselesin sheshý. Atap aıtqanda, 4 658 oryndyq 72 jekemenshik balabaqsha ashyldy, 360 oryndyq 3 memlekettik balabaqshanyń qurylysy aıaqtaldy, 9 mektepte 4 150 oryndyq jańa japsarjaı salyndy.
Qala turǵyndary úshin jańa ómir súrý sapasyn qalyptastyra otyryp, biz kedergisiz orta qurý týraly da umytpaımyz.Bıyl múmkindigi shekteýli adamdar úshin 280 obekt beıimdeldi, memlekettik mektepterdiń 80 paıyzynda ınklúzıvti bilim berý úshin jaǵdaı jasaldy.
TOP-100 KİRÝ
Árıne, daǵdarys qubylystary bizge áser etpedi dep aıta almaımyz, biraq osyndaı kúrdeli jaǵdaıda biz ekonomıkanyń tıimdiligin arttyra aldyq jáne qala damýyn jalǵastyryp kele jatqany anyq.
Prezıdent Qasym-Jomart Toqaevtyń kásipkerlerge memlekettik qoldaýdy keńeıtý tapsyrmasynyń arqasynda qala ekonomıkasyndaǵy jaǵdaı qalpyna kelý belgilerin kórsetip otyr.
Biz pandemıadan keıingi kezeńde ekonomıkanyń ósýi halyqtyń barlyq tobynyń ál-aýqatyna barynsha áser etýi tıis dep esepteımiz. Ár adam óz-ózin taný úshin múmkindikteri keńeıip, ómir súrý sapasy jaqsarǵanyn sezinýi kerek. Osyǵan baılanysty Almatyda naqty jumys isteıtin barlyq kásiporyndar úshin qolaıly jaǵdaı jasaý aldaǵy ýaqytta birinshi kezektegi mindet bolýy tıis.
Búginde Almaty – Qazaqstannyń iri óńirlik ekonomıkasy. Qala salyqtyń tórtten bir bóligin beredi jáne eldiń JİÓ-niń besten bir bóligin quraıdy.
Biz ómir súrý sapasy men bıznes múmkindikteri jaǵynan álemdegi eń úzdik 100 qalanyń qataryna kirýdi maqsat etip qoıdyq. Bul úshin Almatyǵa myqty ekonomıkalyq negiz qajet, tıisinshe JÓÓ jylyna keminde 5 paıyz qarqynmen ósýi tıis.
Mundaı ósýdi qamtamasyz etý úshin jańa ındýstrıa sektorlaryna mán berilip, qala sharýashylyǵyn tereń qurylymdyq reformalaý bastaldy.
Qala ekonomıkasyn ártaraptandyrý mindetin iske asyrýdyń basty quraly –jeke ınvestısıalardy tartý. Búginde 187 mlrd teńge somasyna 21 ınvestısıalyq joba iske asyryldy.
Qalada shaǵyn jáne orta bıznesti damytýǵa úlken mán berilýde. Ony qoldaýdyń negizgi quraldary – memlekettik jáne qalalyq baǵdarlamalar. Biz qazir «Bıznestiń Jol kartasy-2025», «Qarapaıym zattar ekonomıkasy», «Agroónerkásiptik keshendi damytýdyń memlekettik baǵdarlamasy», «Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasy», Almaty Business-2025 sekildi baǵdarlamalar týraly aıtyp otyrmyz.
«Bıznestiń Jol kartasy-2025» baǵdarlamasyn iske asyrýǵa bıyl 18,6 mlrd teńge bólindi. Búginde 127,4 mlrd teńge somasyna 1 351 joba maquldandy.
Jalpy, memlekettik jáne óńirlik baǵdarlamalar aıasynda shaǵyn jáne orta bızneske bıyl 52,2 mlrd teńge nesıe bólindi.
Qazirdiń ózinde qalada 52,3 myń jańa jumys orny ashyldy. Jumyssyzdyq deńgeıi 5,3 paıyzdan 5,1 paıyzǵa deıin tómendedi, al ortasha aılyq jalaqy 296 myń teńgeni qurady.
Birinshi jartyjyldyqtyń qorytyndysy boıynsha jalpy óńirlik ónimniń ósimi 105,5 paıyz, al 9 aıdaǵy qysqamerzimdi ekonomıkalyq ındıkator 9 paıyzǵa artty.
SHETSİZ QALA
Almatylyqtar úshin teń jaǵdaı men ómir súrý sapasyn qamtamasyz etý – «Nur Otan» partıasy jumysynyń basym baǵyty.
«Shetsiz qala» qaǵıdaty boıynsha Almatyda qosylǵan aýmaqtarda ınjenerlik, kóliktik jáne áleýmettik ınfraqurylymdy jaqsartý jónindegi jobalardy iske asyrý qamtamasyz etiledi.
Injenerlik ınfraqurylymdy damytý sheńberinde qalanyń 24 shaǵynaýdanynda uzyndyǵy 92 shaqyrym sý qubyry jáne 36,5 myń úıdi qamtı otyryp, 77 shaqyrym káriz jelisi tartyldy. Nátıjesinde, turǵyndardy sapaly aýyzsýmen qamtamasyz etý 98,4 paıyzǵa deıin jetkizildi.
Bıyl 16 shaqyrym gaz qubyry salyndy, bul halyqtyń gazben qamtamasyz etilýin 99,2 paıyzǵa deıin arttyrýǵa múmkindik berdi.
Jyl sońyna deıin jaryq múldem bolmaǵan kóshelerdi tolyq jaryqtandyrýǵa qol jetkiziledi.
Joldardyń sapasyna da kóp kóńil bólinedi: búginde 415 kóshede uzyndyǵy 108 shaqyrym jol jabynynyń qurylysy júrgizilýde.
Budan basqa, úsh kólik jolaıryǵynyń qurylysy jalǵasýda. Osy jyly Rysqulov dańǵyly men Emsov kóshesiniń qıylysyndaǵy kólik jolaıryǵy boıynsha jáne Buqtyrma kóshesi men Qulja traktisi qıylysyndaǵy kólik jolaıryǵynyń estakadasy boıynsha ishinara qozǵalysty ashý josparlanǵan.
Jyl sońyna qaraı Abaı dańǵylyn Momyshuly kóshesinen Naýryzbaı aýdanynyń ákimshilik ortalyǵyna deıin uzyndyǵy 3,5 shaqyrym joldy ashý josparlanýda.
Almatyda kún saıyn 700 myń avtokólik júredi, mıllıonnan astam adam qatynaıdy. Bul qala ınfraqurylymyna úlken júkteme túsiredi. Sondyqtan qoǵamdyq kólikti damytýǵa erekshe kóńil bólinedi. Metro jelisiniń «Baýyrjan Momyshuly» jáne «Saryarqa» stansalarynyń qurylysy júrip jatyr. Bıyl tehnıkalyq iske qosý josparlanýda. Kelesi «Qalqaman» stansasy boıynsha qurylys jumystary bastaldy.
Turǵyn úı Almaty úshin árqashan ózekti másele bolǵandyqtan, ol bizdiń jumysymyzdaǵy basty mindet sanalady. Qazirdiń ózinde jyl sońyna deıin 5 114 otbasy turǵyn úımen qamtamasyz etiledi dep aıtýǵa bolady. Qalada barlyǵy 1,6 mln sharshy metr turǵyn úı paıdalanýǵa berildi: bul — 10 510 páter jáne 1678 jeke turǵyn úı.
Qala ınfraqurylymyn damyta otyryp, biz turǵyndardyń qaýipsizdigine erekshe nazar aýdaramyz. Qylmystyń ashylý jáne aldyn alý deńgeıin arttyrý, krımınogendik jaǵdaıdy taldaý maqsatynda osy jyly 1 000 ıntellektýaldy beınebaqylaý kamerasy ornatyldy. Infraqurylymynyń tótenshe jaǵdaılarǵa qarsy turýyn arttyrý úshin Naýryzbaı aýdanynda 6 kólikke arnalǵan órt sóndirý deposy paıdalanýǵa berildi, jaqyn arada Alataý aýdanynda osyndaı depony ashý josparlanyp otyr. Joldardaǵy qaýipsizdikti qamtamasyz etý úshin qashyqtan basqarylatyn dachıkteri bar 93 baǵdarshamdy qosý arqyly qalada jol qozǵalysyn basqarýdyń avtomattandyrylǵan júıesin jańǵyrtý aıaqtaldy.
Almatylyqtar jıi kóteretin eń ózekti taqyryp – qala ekologıasy. Ekologıalyq jaǵdaı jaqsarsa, jasyl jelekter alańyn ulǵaıtýǵa, stıhıalyq qoqys tastaıtyn jerlerdi joıýǵa jáne qoqysty kádege jaratýdy tolyq qamtamasyz etýge múmkindik bolady.
Osy jyly ekologıalyq jaǵdaıdy jaqsartý maqsatynda 360 myńǵa jýyq aǵash otyrǵyzylatyn bolady, bul jasyl ekpeler alańyn bir adamǵa 8,4 sharshy metrge deıin ulǵaıtýǵa múmkindik beredi. Kelesi jyly taǵy da 250 myńnan astam aǵash otyrǵyzý esebinen ekpeler alańy bir adamǵa 9,3 sharshy metrge deıin ulǵaıtylatyn bolady.
Qalada qoqys shyǵarý tolyq qamtamasyz etilip, barlyq stıhıalyq qoqys oryndary joıyldy. Qatty turmystyq qaldyqtardy qaıta óńdeý jáne kádege jaratý úlesi 8 paıyzdan 14 paıyzǵa deıin ulǵaıdy.
Qalaǵa kireberiste qosymsha 15 ekopost ornatyldy, 1 600 jeke úı tabıǵı gazǵa aýystyryldy, veloınfraqurylym belsendi damýda.
BELSENDİ TURǴYNDAR
Qazaqstannyń Tuńǵysh Prezıdenti – Elbasy Nursultan Nazarbaev únemi aıtyp ótetindeı «Ult saýlyǵy – memlekettiń basty basymdyǵy».
Biz negizinen qalanyń sporttyq ınfraqurylymynyń jelisi men qoljetimdiligin keńeıtý esebinen turǵyndarynyń densaýlyǵyn nyǵaıtýǵa jáne salamatty ómir salty mádenıetin qalyptastyrýǵa qol jetkize alamyz. Buqaralyq sportty damytý úshin osy jyly 19 mekteptiń deneshynyqtyrý-sport aımaǵynyń qurylysy aıaqtaldy, aýlalarda, saıabaqtarda jáne skverlerde 97 Workout sport alańy ornatyldy. 10 sport nysany paıdalanýǵa beriledi, onyń 6-aýy jergilikti búdjet esebinen. Bul 5 deneshynyqtyrý-saýyqtyrý kesheni, onyń ishinde jańa Almatynyń: Jetisý aýdany Aınabulaq-2, Kemel, Qulager shaǵynaýdandaryndaǵy, Medeý aýdanynyń Alataý shaǵynaýdanyndaǵy, Túrksib aýdanynyń Jas Qanat shaǵynaýdanyndaǵy keshender, Alataý aýdanyndaǵy jabyq jáne ashyq korttary bar tenıs ortalyǵy.
Salý bir bólek, oǵan adamdardy tartý – bir basqa. Meniń oıymsha, bul bizdiń qolymyzdan kelip jatyr. Bul jerde bizdiń sportshylarymyz, federasıalarymyz, qaýymdastyqtarymyz jaqsy úlgi kórsetýde.
Máselen, balalardy tegin sport seksıalarymen qamtýdy arttyrý úshin mektep Sport federasıasymen birlesip, qala mektepterinde sport klýbtaryn ashý jumystary júrgizilýde.
Almaty – jastar qalasy. Munda 700 myńnan astam jastar turady, olardyń 233 myńy stýdentter. Jastar árqashan halyqtyń belsendi toby bolǵan jáne onyń margınaldanýyna jol bermeý quraldarynyń biri jastardyń tıimdi jumyspen qamtylýyn qamtamasyz etý ekenin aıta ketken jón. Ony iske asyrý úshin biz qajetti jaǵdaıdy jasap jatyrmyz.
Máselen, jyl basynan beri jastar praktıkasyna 1 500 adam tartyldy. NEET sanatyndaǵy 600 azamat tolyǵymen kásibı oqytýmen qamtylǵan.
«Almaty jastary 3.0» turǵyn úı baǵdarlamasy aıasynda 837 otbasy tómen paıyzdyq mólsherlememen nesıe aldy.
Jastardyń áleýmettik jobalaryn iske asyrýǵa 100 myńǵa jýyq jas azamattar tartyldy, shyǵarmashylyq jastar, jas ǵalymdar, startapshylar partıadan qoldaý aldy.
***
Elimizdi jańǵyrtý jáne barlyq qazaqstandyqtardyń ómir súrý sapasyn arttyrý jónindegi reformalardyń jalpy memlekettik baǵytynyń jalǵasy sanalatyn «Nur Otan» partıasynyń óńirlik saılaýaldy baǵdarlamasyn oryndaýdyń alǵashqy nátıjeleri osyndaı.
Kelesi jyly 2021 jyly bastalǵan is-sharalardy iske asyrý jalǵasatyn bolady, sondaı-aq jańa jobalardy júzege asyrý bastalady.
Atap aıtqanda, sýmen jabdyqtaý jelisin odan ári keńeıtý esebinen halyqtyń sapaly aýyzsýǵa qol jetkizý deńgeıi 2022 jyldyń sońyna deıin 99 paıyzǵa deıin artady.
Gazǵa qoljetimdiliktiń artýy da nazardan tys qalmaıdy jáne 2022 jyldyń sońyna qaraı bul kórsetkish 99,4 paıyzǵa jetedi. Budan basqa, qalada shamamen 125 shaqyrym aryq jelileri men nóser kárizi qaıta jańartylyp, salynady.
Áleýmettik salada mektepke deıingi jáne orta bilim berý mekemelerine degen úlken qajettilikti eskere otyryp, biz 4 memlekettik balabaqsha salamyz, jekemenshik balabaqshalar ashýdy yntalandyrý jónindegi jumys jalǵasady, bul balalardy (3-6 jas) mektepke deıingi tárbıemen qamtýdy 93 paıyz arttyrýǵa múmkindik beredi. 2022 jyly 7 mektep, onyń ishinde osy jyly bastalǵan 5 mektep pen 5 japsarjaı salynady.
İskerlik belsendilikti yntalandyrý jáne jumyspen qamtýdy jaqsartý úshin Qarapaıym zattar ekonomıkasy, Almaty-Business-2025 jáne taǵy da basqa sıaqty kásipkerlikti qoldaý baǵdarlamalaryn iske asyrý jalǵasady. 5 ónerkásip parkteri ashylatyn bolady. 50 myńnan astam jumys ornyn ashý arqyly biz jumyssyzdyq kórsetkishin 5,1 paıyzdan aspaıtyn deńgeıde saqtap qalýǵa tyrysamyz.
Turǵyn úı baǵdarlamasy sheńberinde 2 800-ge jýyq otbasy baspanaly bolady. 200-den astam kóppáterli turǵyn úı kúrdeli jóndeýden ótedi. Qalanyń barlyq aýdandarynda 200-ge jýyq aýlany kóriktendirýge nıettimiz.
Bul sharalar, sondaı-aq basqa da birqatar áleýmettik mańyzy bar is-sharalar ómir súrý jáne jumys isteý jaǵdaıyn jaqsartýǵa múmkindik beredi.
Aldymyzda barlyǵymyz úshin mańyzdy kún – Táýelsizdigimizdiń 30 jyldyǵy. Tarıh tolqynynda úsh onjyldyq – az ǵana sát, biraq dál osy kezeń táýelsiz zamanaýı memleketti qurý jolyna nyq senimmen qadam basqan Qazaqstan ómirindegi mańyzdy tarıhı kezeńge aınaldy. Táýelsizdik jyldary saıası turaqtylyq pen eldiń eleýli ekonomıkalyq damý kezeńi ótti.
Sońǵy ýaqyttaǵy syn-qaterler partıanyń saıası tuǵyrnamasynda kórinis tapqan bizdiń qoǵamymyzdyń basty qundylyqtarynyń, eń aldymen adamı qundylyqtardyń, zań ústemdiginiń, birlik pen bolashaqqa degen birlesken umtylystyń, otbasylyq qundylyqtar men dástúrlerdiń mańyzdylyǵyn taǵy da rastady. Qoǵamymyzdyń irgeli negizderin ustana otyryp, biz jańa jetistikter úshin kúsh biriktirdik.
Nur Otan partıasynyń «Ózgerister joly: ár azamatqa laıyqty ómir!» saılaýaldy baǵdarlamasy Tuńǵysh Prezıdent – Elbasy Nursultan Nazarbaev negizin qalaǵan reformalar men qaıta qurý baǵytynyń Jol kartasy. Bul órshil, biraq naqty eseptelgen maqsattar men qajetti resýrstarmen bekitilgen baǵdar. Osy úderiste basty shoǵyrlandyrýshy ról atqarýǵa shaqyrylǵan, eldiń jetekshi saıası kúshi – «Nur Otan» partıasynyń belsendi kúsh-jigeri osylardy oryndaýǵa baǵyttalǵan. Almaty qalasy oǵan senimdi qoldaý kórsetetinine kúmán joq.
Baqytjan SAǴYNTAEV,
Nur Otan partıasy
Almaty qalalyq fılıalynyń tóraǵasy,
Almaty qalasynyń ákimi