AES salýdy qoldaý jónindegi halyqtyq shtab jumysyn Pavlodar oblysynda jalǵastyrdy, dep habarlaıdy aqshamnews.kz
Senat Tóraǵasy Máýlen Áshimbaev bastaǵan depýtattar, sarapshylar jáne qoǵam qaıratkerleri Aqsý jáne Pavlodar qalalarynda bolyp, energetıkalyq korporasıa ujymymen jáne metalýrgıa salasynyń mamandarymen kezdesti. Sonymen qatar, shtab músheleri sarapshylar qaýymdastyǵy men belsendi jastarmen de júzdesti. Kezdesýler barysynda AES salý máselesine qatysty aldaǵy referendýmnyń mańyzdylyǵy men máni talqylandy.
Eýrazıalyq energetıkalyq korporasıa jáne Qazaqstan alúmınıi kompanıasy ujymdarymen kezdesýlerde shtab músheleri energetıka salasyndaǵy ózekti máselelerge, ásirese elektr energıasynyń tapshylyǵy, elektr stansalarynyń tozýy jáne ımportqa táýeldilikke keńinen toqtaldy.
Máýlen Áshimbaev atap ótkendeı, Qazaqstan jan basyna shaqqandaǵy kómirqyshqyl gazyn shyǵarý boıynsha álemde aldyńǵy oryndardyń birin alady. Osyǵan baılanysty elimizde kómirtegi qaldyqtaryn azaıtý úshin óndiriste ınovasıany keńinen engizý mańyzdy. Aýaǵa kómirqyshqyl gazyn az shyǵaratyn energıa kózderin paıdalaný arqyly eldegi energıa tapshylyǵyn sheshý máselesi óte ózekti bolyp otyr.
«Prezıdentimiz Qasym-Jomart Toqaevtyń maquldaýymen 6 qazanda elimizde AES salý máselesine qatysty respýblıkalyq referendým ótedi. Referendýmnyń mańyzdylyǵyn túsindirý maqsatynda halyqtyq shtab quryldy. Onyń quramynda depýtattar, partıalar, túrli uıymdar jáne el bolashaǵyna beı-jaı qaramaıtyn belsendi azamattar bar. Qazirgi tańda elimizdegi jumys istep turǵan kómir elektr stansalarynyń tozý deńgeıi shamamen 70 paıyzǵa jetti. Árıne, Qazaqstan tabıǵı resýrstarǵa baı, biraq olardyń kópshiligi qalpyna kelmeıtin resýrstar ekenin umytpaýymyz kerek. Bul resýrstar sheksiz emes. Sondyqtan eldiń bolashaǵyn qamtamasyz etetin turaqty jáne qaýipsiz energıa kózi qajet. Osy turǵyda atom elektr stansasy uzaq jyldar boıy senimdi energıamen qamtamasyz ete alatyn áleýetke ıe», – dedi Máýlen Áshimbaev.