AES salýdy qoldaý jónindegi shtab músheleri «DAMU» ındýstrıalyq-logıstıkalyq aımaǵynda shaǵyn jáne orta bıznes ókilderimen kezdesti, sondaı-aq, «GREEN Land ALATAU» jylyjaıyna bardy.
Kezdesýler barysynda atom elektr stansasynyń el ekonomıkasyna qosatyn úlesi men onyń mýltıplıkatıvti áseri týraly keńinen áńgime órbidi. Ásirese, AES qurylysy myńdaǵan jańa jumys oryndaryn ashýǵa, ınfraqurylymdy damytýǵa jáne otandyq bıznestiń órkendeýine jańa serpin beretini aıtyldy.
«Atom elektr stansasyn salý – elimizdiń bolashaǵy úshin strategıalyq mańyzy bar sheshim. Bul tek energetıkalyq qaýipsizdigimizdi qamtamasyz etip qana qoımaı, sonymen birge, ekonomıkalyq ósim men halyqtyń ál-aýqatyn jaqsartýǵa múmkindik beredi. Ár azamattyń daýsy asa mańyzdy, sondyqtan biz bul máselege baıypty qaraýymyz kerek. Referendým – halyqtyń pikirin tyńdap, ony iske asyrýdyń tıimdi joly. Men qazaqstandyqtar AES salý bastamasyn qoldap, eldiń damýyna óz úlesterin qosady dep senemin», – dep Máýlen Áshimbaev qazaqstandyqtardy referendýmǵa qatysyp, belsendi daýys berýge shaqyrdy.
Sonymen qatar, kezdesý barysynda AES salý arqyly elimizdiń energetıkalyq táýelsizdigi men turaqtylyǵyna qalaı qol jetkizýge bolatyny, onyń qorshaǵan ortaǵa áseri jáne uzaq merzimdi tıimdiligi de talqylandy. Shtab músheleri atom energetıkasynyń Qazaqstandy aldaǵy jyldardaǵy negizgi energıa kózine aınaldyryp, ekologıalyq turaqtylyqqa jol ashatynyn atap ótti.