Atyraý oblystyq halyqtyq shtab ókilderi AES qurylysy boıynsha Atyraý medısına koleji ujymymen kezdesti.
Kezdesýge aqparattyq úgit-nasıhat júrgizetin jumys tobynyń músheleri Aıbar Erekeshov, Túrkmenbaı Nurjigitov, Nurbol Qurman jáne Fatıma Týleeova qatysty. Olar aldaǵy 6 qazanda ótetin respýblıkalyq referendýmnyń mańyzdylyǵyna toqtaldy.
«Biz reformalardy naqty qadamdarmen kezeń-kezeńimen júzege asyryp kelemiz. Basty maqsat — árbir azamat pen otbasynyń reformalar ıgiligin sezinýi. Referendým — bul ár azamatqa óz eliniń bolashaǵyna qatysty sheshim qabyldaýǵa tikeleı qatysý múmkindigi. Energetıkanyń damýysyz el ekonomıkasynyń damýy múmkin emes. AES salý jańa kásiporyndardyń ashylýy, jańa jumys oryndarynyń qurylýy jáne ekonomıkalyq ósýdiń negizgi faktoryna aınalady», — dedi qalalyq máslıhat depýtaty Nurbol Qurman.
Óz kezeginde oblystyq máslıhat depýtaty Fatıma Týleeva:
«Búginde kóptegen ınvestısıalyq jobalar bar. Qarjy bar, ınvestorlar daıyn. Alaıda turaqty energıa kózderi jetispeıdi. AES qurylysy elimizdiń ındýstrıalızasıaǵa ótýine, shıkizatqa táýeldilikten arylýyna yqpal etedi. Ekonomıkalyq turǵydan bul eldiń ınvestısıalyq tartymdylyǵyn arttyrady», — dep atap ótti.
Kezdesý barysynda medısına qyzmetkerleri «AES-tiń qandaı qaýipteri bolýy múmkin?», «AES qurylysynyń elge jáne aımaqqa qandaı paıdasy bar?», «Atom elektr stansıasyn salýǵa qansha ýaqyt ketedi?» degen suraqtaryna tolyq jaýap aldy.