QazUPÝ rektory Bolat Tlepov ótip jatqan referendýmǵa qatysyp, óz tańdaýyn jasady.
– Referendým – halqymyz úshin taǵdyrly saıası sheshim qabyldaıtyn óte mańyzdy naýqan ekeni belgili. AES salý máselesi, ekonomıkalyq sıpatqa ıe bolsa da, dál osyndaı sheshimderdiń qataryna jatady dep sanaımyn. Bul joba elimizdiń bolashaǵyna, onyń ál-aýqatyna túbegeıli áser etýi múmkin. Sondyqtan árbir azamat osyndaı mańyzdy sheshimder qabyldaýǵa qatysýy kerek. Bul – qoǵamnyń kútkenine ádildikpen jaýap berý, bizdiń Prezıdentimiz únemi aıtyp kele jatqan ashyqtyq pen ádilettilik, - dep atap ótti Bolat Tlepov.
2024 jyldyń 6 qazanynda Qazaqstanda atom elektr stansıasyn salý máselesine arnalǵan respýblıkalyq referendým bastaldy. Búgin 10 323 saılaý ýchaskesi jumys isteıdi, onyń ishinde 74-i sheteldegi 59 elde ornalasqan. Daýys berý tizimine 12 mln 244 myń 683 azamat engizilgen. Referendýmdy 30 shet memleketten jáne 4 halyqaralyq uıymnan kelgen 177 baqylaýshy qadaǵalaýda.