Osyndaı taqyryppen partıanyń shtab músheleri, Qazaqstan Respýblıkasy Parlamenti Májilisiniń depýtaty, Agrarlyq máseleler jónindegi komıtetiniń múshesi Bekqalı Torǵaev, Almaty qalasy boıynsha AMANAT partıasynyń atqarýshy hatshysy Meırjan Otynshıev, Almaty qalasy máslıhatynyń depýtaty Bolat Sadyqov QazUAZÝ-dyń rektory Tilektes Espolov, oqytýshylar quramy men stýdentterimen kezdesý ótkizip, referendýmǵa qatysty óz oılaryn ortaǵa saldy, dep habarlaıdy Almaty-akshamy.kz.
Óz sózinde respýblıkalyq shtab múshesi, depýtat B.Torǵaev el Prezıdenti Qasym-Jomart Kemeluly Toqaevtyń Konstıtýsıaǵa ózgerister men tolyqtyrýlar engizý týraly respýblıkalyq referendým ótkizýdiń mán-mańyzyn jáne azamattyq qoǵamdy damytý, halyqtyń memlekettik basqarýǵa qatysý belsendiligin yntalandyrý máselesi kún tártibine qoıylǵanyn keńirek baıandap ótti.
«Referendým Ata zańnyń 33 babyna 56 ózgeris engizýdi kózdeıdi. Konstıtýsıa reformasy memlekettiń barlyq modelin keshendi túrde transformasıalaýǵa baǵyttalǵan. Ózgerister sýperprezıdenttik basqarý formasynan yqpaldy Parlament pen jaýapty úkimeti bar prezıdenttik respýblıkaǵa ótýdi qamtamasyz etpek. Sonymen qatar, adam quqyqtaryn qorǵaýdy kúsheıtý maqsatynda «Konstıtýsıalyq Sot» jáne «Adam quqyqtary boıynsha ýákiletti organ» degen eki jańa bap engizilmek. Odan keıin saılaý júıesi ózgereıin dep otyr. Endi kez kelgen qazaqstandyq azamat ózin depýtattyqqa usynýǵa múmkindik alatyn bolady», - dedi Bekqalı Torǵaev.
Odan ary ol Prezıdenttiń oblystar men qala, aýdan ákimderiniń sheshimin óz qalaýynsha toqtata almaıtynyn, endi bul quqyq shektelip, jergilikti máslıhattardyń jaýapkershiligin arttyrý alǵa shyǵatynyna toqtaldy. Jańashyldyqtyń taǵy biri jer máselesine qatysty ózgeris. Qazirgi zań boıynsha jer memleket menshigi bolyp sanalady. Endi jer, sý kózderi men basqa da tabıǵı resýrstar halyqqa tıesili bolmaq. Menshik quqyǵyn halyq atynan memleket júzege asyrady. Osyǵan baılanysty halyq óz sheshimin qabyldaýǵa tıis ekendigin de atap ótti.
«Jalpy, aldaǵy Ata zańda barlyq adamnyń múddesi eskerilgenin kórip otyrmyz. Bizder osy berilgen múmkindikti tolyq paıdalanyp, usynylǵan ózgeristerdi qoldaýǵa tıispiz dep oılaımyn. Referendýmǵa qatysý – erteńin oılar eldiń ortaq isi. Sondyqtan, ustazdar men stýdent shákirtterdi Jańa Qazaqstanǵa qadam bastaıtyn ıgilikti joldaǵy jarqyn tańdaýdy birge jasaýǵa shaqyramyn», - dedi sóziniń sońynda depýtat B.Torǵaev.
Elimizdegi demokratıalandyrý úderisin odan ary jalǵastyrýdy kózdeıtin Konstıtýsıalyq ózgerister men tolyqtyrýlar engizý týraly kezdesýge qatysýshylar tarapynan qoıylǵan túrli suraqtarǵa da tolyq jaýap qaıtaryldy.
Óz kezeginde ustazdar men stýdentter aldaǵy 5 maýsymda ótetin referendýmǵa uıymshyldyqpen qatysatyndaryn ári el bolashaǵy úshin jasalynbaq qadamdardy tolyq qoldaıtyndyqtaryn jetkizdi.
«Qasym-Jomart Toqaev bastamashy bolǵan konstıtýsıalyq reformalardyń aıryqsha mańyzdy tusy bılik pen Prezıdenttiń qandaı da bir saıası paıdany kózdemeıtini dep sanaýǵa bolady. Bul reformalar Memleket basshysy sońǵy jyldary usynǵan saıası bastamalardyń qısyndy jalǵasy bolmaq. Barshańyzdy saılaý ýchaskesine kelip, referendýmǵa qatysýǵa shaqyramyn!» - dep túıindedi M.Otynshıev.
AMANAT partıasynyń respýblıkalyq jáne qalalyq shtab músheleri kezdesý aıasynda ýnıversıtettiń ǵylymı-ınnovasıalyq ınfraqurylymymen tanysyp, Vagenıngen ýnıversıtetimen jumys isteý ınstıtýtynda, mıkroklonaldy kóbeıý zerthanasynda bolyp, JOO bazasynda atqarylyp jatqan ınovasıalyq jetistikterge rızashylyqtaryn bildirdi.