5 maýsymda elimizde asa mańyzdy saıası shara - referendým ótedi.
Osyǵan oraı biz Memlekettik respýblıkalyq akademıalyq koreı teatrynyń dırektory Elena Kımmen az-kem suhbat qurǵan edik.
- Elena Vıktorqyzy, bıyl akademıalyq koreı teatryna 90 jyl tolady. Mereıtoılaryńyz quty bolsyn!
- Rahmet. Shynynda da, bıyl Memlekettik respýblıkalyq akademıalyq koreı teatryna 90 jyl tolady. Bul - bizdiń teatr úshin ǵana emes, jalpyqazaqstandyq mádenıet úshin de asa mańyzdy oqıǵa.
- Memleket tarapynan, tıisti mekemelerden teatrǵa qandaı qoldaýlar kórsetilip jatyr?
- Bizdiń teatr - biregeı óner ordasy. Bul - Koreıadan tys jerde ornalasqan álemdegi jalǵyz memlekettik teatr. Bul - memleketimizdiń koreı halqyna kórsetip otyrǵan zor qurmeti. Sport jáne mádenıet mınıstrligi shyǵarmashylyq damý men órkendeý úshin barlyq jaǵdaıymyzdy jasap, jańa múmkindikterge jol ashýda. Bizdiń óner ordasyna memleket pen mınıstrlik árqashanda úlken qoldaý kórsetip keledi. Jaqynda Prezıdent Jarlyǵymen teatrymyzdyń maıtalmany, tanymal tulǵa Oleg Safronovıch Lı «Barys» ordenimen marapattaldy. Bul bizge jáne bizdiń teatrǵa kórsetilgen úlken qurmet dep oılaımyn.
- 5 maýsym kúni elimizde úlken saıası oqıǵa oryn almaq. Jalpy, referendým týraly qandaı pikirdesiz?
- 5 maýsymda elimizde Konstıtýsıaǵa túzetýler men ózgerister engizý boıynsha referendým ótpek. Bul - bizdiń memleketimiz úshin óte jaýapty jáne mańyzdy shara. Referendým - bul halyq bıliginiń aıqyn kórinisi, eldiń árbir azamatynyń óziniń azamattyq ustanymyn bildire otyryp, «Jańa Qazaqstandy» qurýǵa tikeleı úles qosa alatyndyǵynyń kórinisi. Memleket basshysynyń jańa Qazaqstandy qurý jáne referendým ótkizý týraly ıdeıasy - tarıhı oqıǵa. Óıtkeni bul - bizdiń tarıhymyzdaǵy 27 jyldan keıin ótkiziletin ekinshi referendým. Referendýmnyń tarıhı mańyzy tutastaı alǵanda memlekettiń taǵdyryna qatysty máselelerdi halyqtyń talqylaýyna shyǵarý, demokratıanyń negizderin bekitý, bolashaqqa damýǵa jańa saıası jol salý bolmaq.
«Aldaǵy referendým árbir azamattyń Qazaqstannyń bolashaǵyn aıqyndaıtyn tarıhı oqıǵaǵa tikeleı qatysýyna múmkindik beredi», - dedi Prezıdent.
Biz, shyǵarmashylyq adamdary, Memleket basshysynyń júrgizip otyrǵan zaıyrly saıasatyn árdaıym qoldaımyz. El tarıhynda oryn alatyn osyndaı mańyzdy oqıǵaǵa Memlekettik respýblıkalyq akademıalyq koreı teatry belsendi qatysady. Óıtkeni bul - bizdiń bolashaǵymyz, bizdiń memleketimiz!
- Suhbatyńyz úshin rahmet! Mereıtoılaryńyz qutty bolsyn!