Endi sportpen shuǵyldanatyn oqýshylar dene shynyqtyrý sabaǵynan bosatylady. Bul týraly Dúnıejúzilik gımnazıada – 2022 jeńimpazdary men júldegerlerin marapattaý rásiminde Bilim jáne ǵylym mınıstri Asqat Aımaǵambetov málimdedi, dep habarlaıdy Almaty-akshamy.kz BAQ.kz-ke silteme jasap.
«Prezıdent 1 000 mektep salý boıynsha tapsyrma bergenin bilesizder. Endi osy mektepterdi jańa úlgide salyp jatyrmyz. Sonyń ishinde osy mektepter bir emes, birneshe sport zaldarmen jabdyqtalady. Ol boıynsha jumys istep jatyrmyz. Sondaı-aq jańa tıptik jobalar daıyndalyp jatyr. Bul da elimizdegi sportty damytý úshin septigin tıgizedi», - dedi Asqat Aımaǵambetov.
Sonymen qatar Bilim jáne ǵylym mınıstrliginiń basshysy oqýshylar men olardyń jattyqtyrýshylary jıi kóterip júrgen máselege toqtaldy.
«Bizde aptasyna 3 saǵat dene shynyqtyrý sabaǵy ótedi. Endi kúnde, tipti aptasyna 5-10 daıyndalyp júrgen oqýshylardy, sportshylardy osy pánnen bosatý nemese erikti túrde qatysýǵa qatysty usynys boldy. Bul usynysty biz (mınıstrlik – avt.) zerttedik, jan-jaqty qaradyq. Qazir tıisti zańnamaǵa ózgerister engizilip jatyr. Endi kúndelikti sportpen aınalysyp júrgen oqýshylarǵa osyndaı múmkindik beriledi», - dep túsindirdi Asqat Aımaǵambetov oqýshylardy marapattaý rásiminde.