Almaty ákimdiginde qala basshysy Darhan Satybaldynyń tóraǵalyǵymen balalarǵa arnalǵan ǵylym mýzeıi jobasyn júzege asyrý jóninde keńes ótti.
Bul Ortalyq Azıadaǵy alǵashqy bilim berý ortalyǵy bolmaq, ol mektep oqýshylary men jas urpaq arasynda ǵylymdy keńinen nasıhattaıtyn alańǵa aınalady, - dep habarlaıdy Aqshamnews.kz.
Joba Singapore Science Centre Global halyqaralyq franshızasy aıasynda Kingsmen Exhibits kompanıasymen birlese júzege asyrylyp otyr. Bolashaq mýzeı bilim berý ortalyǵy ǵana emes, mektep, kolej jáne ýnıversıtet baǵdarlamalaryna zamanaýı ǵylymı jetistikterdi engizetin platforma bolmaq.
Keńes barysynda qurylys jumystarynyń qazirgi barysy qaraldy. Búginde buzý jumystary aıaqtalýǵa jaqyn. Sonymen birge jobalaý-smetalyq qujattama ázirlenip, ınjenerlik zertteýler qolǵa alynǵan. Ǵımarat qurylymdaryn seısmıkalyq talaptarǵa sáıkes nyǵaıtý jumystary qyzǵan. Onymen qatar halyqaralyq jáne jergilikti sarapshylardyń atsalysýymen mýzeıdiń bilim berý jáne kórme mazmuny daıyndalyp jatyr. Instıtýsıonaldyq damý máselesi qarastyrylyp, halyqaralyq áriptespen yntymaqtastyq baǵyttary talqylanýda.
Jobany júzege asyrýdyń merzimi aıqyndaldy. Qurylys-montaj jumystary 2026 jyldyń sáýir aıynda aıaqtalyp, maýsym aıyna saltanatty ashylý rásimi josparlanǵan.
Darhan Satybaldy jobanyń strategıalyq mańyzyn atap, jaýapty basqarmalarǵa árbir kezeńdi sapaly túrde oryndaýdy tapsyrdy. Mýzeıdiń uzaq merzimdi damýy úshin Almaty qalasynyń Bilim basqarmasy strategıalyq salalyq kýrator bolyp bekitildi. Bul qadam jobaǵa turaqty damý mısıasyn qamtamasyz etip, balalar men jas býyn arasynda ǵylymdy dáripteýge, zertteýshilik qyzyǵýshylyqty qalyptastyrýǵa jáne bolashaq mamandyqqa erte baǵdar berýge múmkindik beredi.
Jıyn sońynda Almaty ákimi ǵylym mýzeıi eldiń flagmandyq jobasyna aınalatynyn, ol bilim, ǵylym men mádenıetti biriktirip, óskeleń urpaqtyń zertteýshilik oılaýyn damytyp, balalardy zamanaýı tehnologıamen tanystyryp, olardyń zıatkerlik ári shyǵarmashylyq turǵyda ósýine jol ashatynyn atady.