Almaty qalasynyń Mýzeıler birlestigine qarasty Mýltımedıalyq dástúrli mýzyka ortalyǵyna kúıshi, dombyrashy, Qazaqstannyń eńbek sińirgen artısi Raqym Tájibaevtyń dombyrasy saltanatty túrde qabyldandy.
Raqym Tájibaıuly 1946 jyly mamyrda dúnıege kelgen. 1955 jyly Qytaı Halyq Respýblıkasynan Jetisý oblysynyń Aqsý aýdanyndaǵy Saǵabúıen aýylyna ata-anasymen birge oralady. Orta mektepti bitirgen soń Almaty qalasyndaǵy Respýblıkalyq estrada jáne sırk kolejine oqýǵa qabyldanyp, profesor Qubysh Muhıtovtyń synybynda dáris alady. Sonymen qatar tarıh sahnasynda óz orny bar Rústembek Omarov, Maǵaýıa Hamzın, Ázıdolla Esqalıevterden tálim alǵan. Keıinirek Abaı atyndaǵy pedagogıkalyq ýnıversıtetiniń mýzyka pániniń muǵalimi mamandyǵyn támamdaǵan. Oqý ornynda shákirt bola júrip kúıshi «Qazaqkonsert» birlestigimen qatar, «Gúlder» ansamblinde óner kórsetedi. Sonymen qatar «Samal», «Serper» ansámblderinde kórkemdik jetekshi ári jeke oryndaýshylyq qyzmetterin atqarǵan.
– Raqańnyń qolynyń izi, sazy qalǵan osynaý kıeli aspaptyń elimizdiń nebir dúldúl ánshi, jyrshy, kúıshileriniń dombyralarynyń sapynan oryn alǵanyna qýanyshtymyn. Soǵan laıyqty dep tanyp jatqan sizderge rahmet aıtamyn. Raqym Tájibaevtyń repertýarynda 150-den astam kúıi bar. Sondaı-aq, birneshe dombyra synybyn ashyp, talantty jastardy tárbıeleýde aıryqsha eńbek etken tulǵa. Kúı ónerine ózindik qoltańbasyn qaldyryp, jańa beleske kótergen ol dombyrany da keremet jasaıtyn sheber retinde de tanymal boldy. Onyń qońyr dombyrasy mýzeıge amanat! – dedi aspapty Mýltımedıalyq dástúrli mýzyka ortalyǵynyń jetekshisi Roza Júnisqyzyna tabystaǵan kúıshiniń jary, QR Mádenıet qaıratkeri, ánshi, termeshi Ajargúl Tájibaeva.
Rýhanı is-sharada kúıshi, dombyrashy, Qazaqstannyń eńbek sińirgen qaıratkeri Shámil Ábiltaı, «Qurmet» ordeniniń ıegeri, dástúrli ánshi Ramazan Stamǵazıev sóz sóılep, kúıshiniń ónerdegi jolynan syr shertip, urpaqqa qaldyrǵan murasynyń máńgi jasaı beretinin aıtty. Keshke Qurmanǵazynyń «Aman bol sheshem, aman bol!», «Serper», Táttimbettiń «Kókeıkesti», Ábdimomyn Jeldibaevtyń «Erke sylqym» kúıi, Ábiken Hasenovtiń «Qońyry», Jánibek Kármenovtiń «Oılamańdar, jigitter» termesi kórik berdi.