Qyz balalar Rapýnsel sındromyna jıi ushyraıdy eken.
Astana news telegram arnasynyń jazýynsha, elorda dárigerleri naýqastyń asqazanynan "shash isigin" aldy, dep habarlaıdy Almaty-akshamy.kz
İsh aýrýy men júrek aınýyna shaǵymdanyp kelgen Astana qalasynyń 15 jasar turǵynyn tekserý kezinde asqazannyń trıhobezoary anyqtalyp, operasıaǵa jiberilgen.
Bul sındrom naýqas shash jutyp qoıǵan kezde qoıylady. Saldarynan shash asqazan-ishek jolynda jınalyp qalady.
Dárigerlerdiń aıtýynsha, bul aýrý óte sırek kezdesedi. Asqazanda shatasyp jınalǵan shashtyń kóp mólsheri trıhobezoar aýrýynyń nemese "shash isiginiń" paıda bolýyna ákep soǵady,ol asqazandy birtindep "bitep", jumysynyń túbegeıli buzylýyna ákeledi. Pishini boıynsha mundaı isik asqazan pishinine dál sáıkes keledi.
"Ǵylymı málimetterge sáıkes, Rapýnsel sındromy bar pasıentterdiń 70 paıyzy - 20 jasqa tolmaǵan qyzdar", - deıdi hırýrg Azamat Orazalınov.
Onyń aıtýynsha, qyz balalar uldarǵa qaraǵanda Rapýnsel sındromyna jıi ushyraıdy. Áıelderdiń shashy ádette er adamǵa qaraǵanda uzynyraq, sondyqtan asqazannyń shyryshty qabatynda qalyp qoıý yqtımaldyǵy joǵary. Bala shashty jutqan kezde isik kólemi ulǵaıady jáne ol sińirilmeıtin aýqymdy massaǵa jınalady.
Trıhofagıa jáne pıkasızm (tábettiń buzylýy jáne jeýge jaramsyz zattardy jeýge degen qalaý) denesinde temir jetispeıtin adamdarda kezdesedi. Ǵylymdaǵy zertteýge súıensek, pasıent quramynda temir bar preparattardy qabyldaǵannan nemese selıak aýrýyn emdegennen soń ǵana shashtyń túsýi jáne ony jutý toqtaǵan.