Almatyda qýyrshaq teatrlarynyń VI Halyqaralyq «Orteke» festıvali óz máresine jetti.
Baıqaýǵa Grýzıa, Túrkıa, Koreıa, Ózbekstan jáne Qyrǵyzstannyń qýyrshaq teatrlary qatysyp, kórermen nazaryna balalar men eresekterge arnalǵan úzdik qoıylymdaryn usyndy. Atalmysh baıqaý Respýblıkalyq memlekettik akademıalyq koreı mýzykalyq komedıa teatrynda, Memlekettik qýyrshaq teatrynda jáne Totalnyı teatr sahnalarynda ótti.
«Ertegiler álemine jetelegen qýyrshaqtar festıvali jaqsy ótti. Spektáklder kóp bolmasa da túri, formasy, mazmuny jaǵynan ártúrli bolyp keldi. Tek balalar emes, eresek adamdar da fılosofıaǵa, oı-tolǵamdarǵa jeteleıtin qoıylymdardy tamashaladyq. Dástúrli, fólklorlyq, jármeńkelik spektáklder boldy. Spektáklderdiń kórkemdik deńgeıi joǵary. Kásibı turǵydan óz pikirimizdi de aıtyp otyrdyq. Qarap otyrsaq, qaı teatr bolmasyn, barlyǵy da bir úıdiń balasyndaı tatý-tátti beıbit ǵumyr keship jatqany qýantady. Qazirgi ýaqytta 7 memlekettik qýyrshaq teatry bar. Elimizdiń drama teatrlary qýyrshaq ónerine qyzyǵýshylyq tanytyp, qýyrshaq trýppalaryn ashyp jatyr. Ár óńirde qýyrshaq óneri órkendep, damyp kele jatqany biz úshin úlken qýanysh», – dedi qazylar alqasynyń tóraǵasy Anar Erkebaı.
Festıváldiń qazylar alqasynyń qatarynda Qazaqstan, Koreıa, Grýzıa jáne Túrkıanyń teatr qaıratkerleri boldy. Olar akterlarǵa ádil baǵalaryn berdi.
Qýyrshaq festıvaliniń bıylǵy jeńimpazdaryna kelsek, «Orteke» VI Halyqaralyq qýyrshaq teatrlary festıvaliniń «Eń úzdik qoıylym» nomınasıasy boıynsha Iakob Gogebashvılı atyndaǵy Kýtaısı memlekettik kásibı qýyrshaq teatrynyń «Gadkıı ýtenok» spektakli jeńimpaz atandy. «Eń úzdik akterlik sheberlik» atalymy boıynsha E.Lokshınanyń «Men bir jumbaq adammyn. Abaı» qoıylymy úshin Almaty qalasynyń Memlekettik qýyrshaq teatry úzdik dep tanyldy. «FFWANG» teatrynyń akteri Kvan So Óng «Eń úzdik qýyrshaq júrgizýshsi» atandy. Al «Eń úzdik senografıa» marapatyna Totalnyı teatr ujymynyń «Dúımovochka» týyndysy ıe boldy. «Eń úzdik qýyrshaq sýretshisi» «Aq keme» (Sh. Aıtmatov) qoıylymy úshin «Alaqaı» Aqtóbe oblystyq qýyrshaq teatrynyń sýretshisi Ásıa Qurmanalınaǵa buıyrdy. «Orteke» festıvali uıymdastyrý komıtetiniń arnaıy júldesimen «Qozy Kórpesh – Baıan sulý» (Ǵ.Músirepov) qoıylymy úshin Mańǵystaý oblystyq qýyrshaq teatry marapattaldy.