Qazaqstan Musylmandary dinı basqarmasy Ramazan aıyna deıin araq ishken adamnyń orazasy qabyl bola ma degen suraqqa qatysty pátýa jarıalady, dep habarlaıdy aqshamnews.kz
QMDB ókilderine sensek, shyn táýbe etse, Ramazan aıynan buryn araq ishken adamnyń orazasy araq ishpeı oraza tutqan adamnyń orazasyndaı qabyl bolady.
«Araq-sharap ishý – dinimizde haram, úlken kúná sanalady», - dep jazǵan múftıat buǵan qatysty Quran aıattaryn mysalǵa keltirgen.
«Paıǵambarymyz (oǵan Allanyń salaýaty men sálemi bolsyn): «Kimde-kim araq ishetin bolsa, onyń qyryq kúndik namazy qabyl bolmaıdy» degen. Taǵy bir hadıste: «Kim araq ishse, onyń qyryq kúndik namazy qabyl bolmaıdy. Eger táýbe etse, Alla onyń táýbesin qabyl etedi. Odan keıin taǵy da araq ishse, Alla onyń qyryq kún namazyn qabyl etpeıdi. Eger táýbe etse, Alla táýbesin qabyl etedi. Budan keıin taǵy araq ishse, Alla onyń taǵy da qyryq kúndik namazyn qabyldamaıdy. Bul isine táýbe etse, táýbesi qabyl etiledi. Al tórtinshi ret taǵy da araq ishse, Alla onyń qyryq kúndik namazyn qabyl etpeıdi. Eger táýbe etse, Alla onyń táýbesin qabyl etpeıdi de ony «habál» (tozaqtyqtardyń irińinen jınalǵan) ózeninen sýsyndandyrady» delingen», - dep jazǵan múftıat.
Al, Ramazan aıynyń qarsańynda ishimdik ishýdiń úkimi týraly jazǵan múftıat «oraza ustaýshy Ramazan aıynan eki kún buryn araq iship, sońynan shynaıy táýbe etse, Alla onyń táýbesin qabyl etedi. Onyń orazasy araq ishpeı oraza tutqan adamnyń orazasyndaı bolady. Al oraza ustap araq ishýin doǵarmasa, orazasy durys bolady, biraq saýaby bolmaıdy. Araq ishkeni úshin kúná arqalaıdy» degen pátýa shyǵaryp otyr.