«Bulaq kórseń, kózin ash» degen ustanymǵa berik meniń ustazdyq ǵumyrymda 5-synyptan bastap jetekshilik etetin 11 «G» synyby aıryqsha oryn alady. «Aqyldy tentekterdiń» asaý arynyn men ádebıet pen óner arqyly tárbıeleýge tyrystym.
Shákirtterimniń boıynda jylt etip kóringen daryndy qoldap, saǵyn syndyrmaı senim bildirgenimde oqýshylarym oń tustarymen tanyla bastady. Synyptaǵy ár oqýshym — «segiz qyrly, bir syrly» ónerli balalar. Degenmen, oqýshylarymnyń ishindegi eń zeregi – Raıymbek Nurdaýlet. Raıymbek — jasyndaı jarqyldaǵan ótkir, tańǵy shyqtaı jany taza, poezıaǵa qumar, aqyly zerek, Raıymbek babanyń rýhymen qanattanǵan jas talap. Alǵash synybyma kelgende «tentek» tiziminiń kóshin bastap júrgen bala edi. Raıymbekti tárbıelegen — Abaı men Muqaǵalıdyń ólmes rýhy, óshpes murasy. Muqaǵalıdyń «Raıymbek! Raıymbek!» poemasyn jattaǵaly bizdiń Raıymbektiń sanasyn esimi arnap qoıylǵan uly atasyndaı el qorǵany bolar er bolý armany jaýlady. Sodan beri jigerli jas talaı ret mektepishilik, aýdandyq, qalalyq, respýblıkalyq deńgeıdegi mánerlep oqý saıystarynyń júldegeri atandy. Mektepishilik mánerlep oqý saıysynan eki ret bas júldeni ıemdense, Jambyl kitaphanasynda bolǵan saıystan ekinshi oryn aldy. Muqaǵalı men Abaı óleńderin jatqa biletin óren qalalyq «Abaı oqýlarynda» júldeli úshinshi orynǵa ıe boldy. Boıyndaǵy kúsh-qýatyn óner-bilim jolyna burǵan Raıymbek — búginde qyzyl atestatqa úmitker úzdik oqýshy.
«Ónerli órge júzer» demekshi, Raıymbek shyǵarmashylyq sharalardyń belsendi qatysýshysy, mektep maqtanyshyna aınaldy. Akterlyq qabileti kóz súısindiretin daryndy jas — mektepshilik «Aqsaraı» teatrynyń beldi múshesi. Tabıǵatynan minezi ashyq-jarqyn jetkinshek, utqyr ázilderimen kópshiliktiń kóńilin kótere biledi, osy qasıetine oraı ol — mektepshilik kvn klýbynyń beldi múshesi jáne altyn uıamyzdaǵy kvn oıyndarynyń chempıony.
Esimi tutas eldiń uranyna aınalǵan babasynyń atyn ardaqtaǵan jas bolashaqta eliniń gúldenýine úles qosatyn tulǵa bolýdy armandaıdy. Kelesheginen kóp úmit kúttiretin shákirt qazir «Qazaqstannyń jas patrıottary» uıymynyń Prezıdenti. «Óziń úshin eńbek qylsań, ózi úshin ottaǵan haıýannyń biri bolasyń; adamshylyqtyń qaryzy úshin eńbek qylsań — Allanyń súıgen qulynyń biri bolasyń» degen hakim Abaıdyń ósıetin jadyna ustaǵan jas urpaq alashqa adal qyzmet etýdi kókseıdi.
Armandaryń alasarmasyn, seniń shyǵar shyńyńnyń bıik bolaryna ustazdyq júregimmen senim bildiremin, Raıymbek!