Almatyda jol ınfraqurylymyn damytý aıasynda qala ákimi Erbolat Dosaevtyń tapsyrmasymen jolaıyryqtar salý, magıstraldyq joldar men radıaldy kóshelerdi uzartý jumystary júrgizilýde.
2024 jyldyń sońynda Seıfýllın dańǵyly men Jansúgirov kóshesiniń qıylysynda jolaıryq ashý josparlanyp otyr. Joba aıasynda Seıfýllın dańǵylynda kólikterdiń kedergisiz júrýi úshin jalpy uzyndyǵy 690 metr bolatyn eki túnel salý kózdelgen. Jansúgirov kóshesinde 4 jer ústi jaıaý júrginshiler ótkeli salynyp, trotýarlar jáne kógaldandyrý qarastyrylǵan, dep habarlaıdy almaty-akshamy.kz.
Bıylǵy jyldyń 3-toqsanynda Saıyn kóshesi men Móńke bı kóshesiniń qıylysyndaǵy jolaıyryqty ashý josparlanǵan. Bul «jońyshqa japyraǵy» tıptes jolaıyryq, túrli baǵyty ári kireberisi bolady. Uzyndyǵy 2,3 km bolatyn trotýarlar men velojoldar salý qarastyrylǵan.
Buǵan qosa, 2024 jyldyń sońyna deıin eki kósheni uzartý aıaqtalady. Birinshisi – Saıyn kóshesiniń boıymen Rysqulov dańǵylynan Aqyn Sara kóshesine deıingi jalpy uzyndyǵy 3,2 km jol. Momyshuly kóshesindegi kólik júktemesi 30%-ǵa tómendeıdi dep boljanyp otyr. Ekinshisi – Abaı dańǵylynan B.Momyshuly kóshesinen qala shekarasyna deıin. Jalpy uzyndyǵy 5,3 km bolatyn kósheni uzartý megapolıs ortalyǵynan ÚAAAJ-dan batys baǵytta qosymsha dálizdi qamtamasyz etedi.
Qazir Rysqulov dańǵylyn F.Ońǵarsynova kóshesinen qala shekarasyna deıin uzartý qolǵa alynǵan. Ýchaskeniń jalpy uzyndyǵy – 2,3 km. Kelesi jyly Tilendıev kóshesin Rysqulov dańǵylynan qala shekarasyna deıin uzartý bastalady. Búginde jobalaý-smetalyq qujattama ázirlenip jatyr. Onyń jalpy uzyndyǵy 10,5 km. Dál osy kezeńde Soltústik aınalma kóshesin uzyndyǵy 1,2 km bolatyn qala shekarasyna deıingi uzartýdy bastaý kózdelgen.