Jasy jetpiske jetse de, apaı dep aıtýǵa aýyz barmaıdy
Qazaqta úlken kisini «apa», «apaı» dep qurmet kórsetip ataý ádetimiz bary ras. Alaıda Raısa Mambetovany alǵash kórgen jan onyń shıraq qımylyna, jaıdary júzine qarap, esimine «apaı» degendi jalǵaǵyń kelmeıdi. Sebebi, onyń ón boıynan tasyp turǵan energıasy jastardan asyp túspese, kem emes. Raısa hanym jasy jetpiske kelse de, sportty serik etip, ár kúnin belsendi ómirmen órnektep júrgen jan.
Densaýlyqtyń qadirin aýyrǵanda bilesiń
Raısa hanym sportqa kezdeısoq kelmegen. Birde jumys kezinde qan qysymy kóterilip, esinen tanyp qulaıdy. Dárigerler densaýlyǵyn baqylaýǵa alýdy usynǵanymen, ol dári-dármekti emes, qımyl-qozǵalysty tańdaıdy. Qyzynyń qoldaýymen ınternet arqyly izdenip, salaýatty ómir saltynyń shıpaly jol ekenin uǵynady.
Erte turǵan áıeldiń bir isi artyq...
Raısa Mambetova men jubaıy bes jyldan beri kúnde tańǵy tórtte turady. Jyly sý iship,kóp uzamaı júgirýge shyǵady. Qala ákimdiginiń mańyndaǵy saıabaqta ekeýi on aınalym jasap, tańǵy jattyǵýdy da umytpaıdy. Bul erli-zaıyptynyń kúndelikti ádetine aınalǵan.
Bı – densaýlyqtyń taǵy bir kózi
Raısa hanym bıge de qatysady. Onyń aıtýynsha, «jas ulǵaıǵan saıyn bıleý asa mańyzdy. Qozǵalys azaıǵan jerde aýrý kóbeıedi. Al bılegen kezde dene túgel qozǵalysqa túsedi». Bul pikirin ol kitaptan oqyp, tájirıbede dáleldep júr.
Sportpen ǵana shektelmeıdi
Raısa hanym 53 jasynda kólik júrgizýdi úırengen. «Nemeremdi shahmatqa aparý úshin júrgizýshi bolýǵa týra keldi. Bireýge jalynǵandy unatpaımyn. Óz betimshe úırendim», — deıdi ol. Bul – jańa nárseni úırenýge eshqashan kesh emes ekenin dáleldeıtin taǵy bir mysal.
Úıinde teledıdar joq
Raısa Mambetovanyń úıinde teledıdar joq. Sebebi, teledıdarǵa ketetin ýaqytty ol ózin damytýǵa, kitap oqýǵa, paıdaly aqparat izdeýge jumsaıdy.
«Ómir 50-den keıin toqtamaıdy»
«Kóp adam 50-den asqan soń ómir bitti dep oılaıdy. Shyn máninde, bul – tek bastamasy», — deıdi Raısa hanym. Onyń pikirinshe, kóptegen dert — adamnyń oıynda. «Mıyńdy tazartsań, tán de saýyǵady. Ómirge renjimeı, ashýlanbaı, shúkirshilikpen qaraý kerek», — deıdi ol.
Jeksenbi – belsendi demalys kúni
Raısa Mambetova men ózge de belsendi zeınetkerler jeksenbi saıyn Medeýdegi Gorelnıkke shyǵyp, muzdaı sýǵa shomylýdy ádetke aınaldyrǵan. Bul – olardy rýhanı ári fızıkalyq sergitetin tásil.
Raısa Mambetova úshin jas shekteý emes. Ol ómirge qushtarlyqpen qaraıtyn jandardyń jarqyn úlgisi. Ol óziniń ómir jolymen ár adamǵa motıvasıa bola alady: densaýlyqtyń kilti – qozǵalysta, al baqyt – óz qolyńda.
Jetpiste de júgirý, bıleý, kólik júrgizý, muzdaı sýǵa túsý – múmkin emes deıtinderdiń bárine jaýap. «Ómir bitti» dep emes, «ómir endi bastaldy» dep ómir súrýdi úıretetin jannyń sózi de, isi de shabyttandyrady.
Raısa hanymnyń úlgisi — belsendi ómir salty jasqa qaramaıtynyn, al pozıtıvti oılaý kez kelgen qıyndyqty eńserýge kómektesetinin dáleldeıdi.
Raısa hanymnan keńester
• Kúlip júrińiz. Kóńil kúı – densaýlyqtyń negizi.
• Sportpen aınalysyńyz. Qozǵalys – ómir.
• Negatıv oıdan arylyńyz. Kóńilge aýyrlyq túsirmeńiz.
• Jas – tek san. Qalaýyńyz bolsa, alynbaıtyn qamal joq.