Jaz jaqyndaǵan saıyn bárimiz jumystan bosap, bir demalyp alýdy ańsaımyz. Biraq qalta tespeıtin ári qyzyq saıahatty qalaı josparlaýǵa bolady? Bul jaǵdaıda neni eskerý kerek? Biz osy suraqpen avtorlyq týrlar uıymdastyratyn Aqerke Ońǵarǵa júgindik. Ol jazda tıimdi saıahattaýǵa bolatyn baǵyttar men onyń baǵasyna áser etetin negizgi faktorlardy atady.
Qazaqstandyqtar jıi baratyn arzan elder
Aqerke hanym buryn tek "baı-baǵlandardyń baǵyty" sanalatyn Dýbaıdy qazaqstandyqtar jıi baratyn arzan elder qataryna qosty. Sondaı-aq bul tizimde Qytaı men Mysyr da bar.
Jańa baǵyt - Azıa elderi
Mamannyń aıtýynsha, qazir qazaqstandyqtar burynǵydan jıi saıahattaıdy.
"Buryn shetel dese, tek Túrkıa, BAÁ, Qytaı eske túsetin. Bul baǵyttar negiz bolyp qalyptasyp qalǵan. Budan basqa elderge barýǵa qaýipsizdik, til, taǵam máselesi áser etedi. Biraq keıingi 2 jylda otandastar ońtústik-shyǵys Azıa elderine kóp saıahattaı bastady. Mysaly, Malaızıa, Indonezıa, Sıngapýr, Vetnam syndy elderge baratyn adam kóbeıdi. Buǵan áleýmettik jeli de kóp yqpal etti. Jelide bul elderdiń qaýipsizdigi, ádemiligi, aqsha jaǵynan da tıimdiligi, damyp jatqany kórsetilgen. Bir qyzyǵy, erekshe jerlerge barýdan tartynshaqtaımyz. Bir qazaq qaıda baryp jarnama jasasa, sol elge bas salamyz. Iaǵnı, marketıńtiń áseri bar. Alaıda jastar qazir bári baryp júrgen Dýbaı men Túrkıadan góri, qazaqtarǵa jat, tropıkalyq baǵyttarǵa kóbirek qyzyǵýshylyq tanytyp júr. Bul elderge shyǵyn da az ketedi", - dedi ol.
Mysyr. Foto:pixabay.com
Biraq mynany eskerińiz, bir elge qazaqstandyqtar kóp bara bastasa, keler jyly ol baǵyttyń baǵasy 3 ese ósýi múmkin. Malaızıa – sonyń dáleli.
Saıahatshylar úshin "arzan" degen uǵymdy nemen ólsheýge bolady?
"Ádette, shetelge shyǵatyn kez kelgen saıahatshy ushaq bıleti men qonaqúıdiń baǵasyna qaraıdy. Mysaly, týr-paket arzan bolsa, kóz jumyp sol eldi tańdaıdy. Biraq ol elde kerisinshe, qalta shyǵyny kóp bolýy múmkin. Ony izdenip, zertteıtinder az", - deıdi Aqerke hanym.
Saıahat baǵasyna áser etetin negizgi faktorlar qandaı?
- Maýsymdyq suranys
- Ushaq bıletteriniń quny
- Týrpaket nemese jeke saıahat
- Qalta shyǵyny
- Eldegi ekonomıkalyq jaǵdaı men valúta baǵamy
- Týrısik trendter men áleýmettik jeli
- Vıza men saqtandyrý shyǵyndary
"Eń aldymen, maýsymdyq suranys. Mysaly, adamdar eń jıi saıahattaıtyn baǵyt BAÁ-ǵa qysta saıahattaǵan qymbat. Jazda aýa raıy qatty ystyq, saıahatshylar az bolǵan soń ushaq bıletteri de qonaqúı baǵasy da arzandaıdy. Ekinshi faktor - ınflásıa. Mysaly, buryn Túrkıaǵa baratyn qazaq kóp bolsa, qazir azaıǵan.Lıranyń qunsyzdanýy men eldegi ekonomıkalyq turaqsyzdyq saldarynan Túrkıada baǵa ósip jatyr. Biraq bizde áli kúnge deıin “Túrkıa — arzan el” degen túsinik qalyptasqan", - deıdi ol.
Túrkıa. Foto:pixabay.com
Byltyrmen salystyrǵanda, bıyl saıahattaý arzan ba, qymbat pa?
"Saıahattaý jyl saıyn qymbattap keledi. Buryn halyq arzan ári tıimdi saıahattaýdyń joldaryn bile bermeıtin. Bul turǵyda áleýmettik jelilerdiń yqpaly zor — qazir tájirıbeli saıahatshylar únemdi saıahattaýǵa qatysty laıfhaktaryn bólisedi"
Qazaqtar úshin qaı elder qolaıly?
Aqerke hanymnyń aıtýynsha, qazaqtar úshin tili, taǵamy, mentalıteti jaǵynan Túrkıa, Gúrjistan, Ázerbaıjan, BAÁ elderine saıahattaǵan qolaıly.
Jańa hıt – Ázerbaıjan, Vetnam (Danang)
Aqerke hanym demalystyń eki túrin ajyratady:
- Pasıv demalys (jatamyn, sýǵa túsemin): Dýbaı, Katar, Taıland, Mysyr – týrpaketpen barǵan tıimdi.
-
Belsendi demalys (jaıaý júremin, kóremin): Malaızıa, Gúrjistan, Túrkıa, Eýropa – saıahat josparyn óz betińizshe uıymdastyrǵan durys.
Vetnam. Foto:depositphotos.com
Qalaı únemdeýge bolady? Laıfhaktar
- Maýsymnan tys ýaqytta baryńyz. Mysaly, Dýbaı jazda arzan.
- Bıletti erte alyńyz, keıde alǵashqy reıster 3 ese arzan bolady (mysaly, Malaızıa).
- Blogerlerdi oqyńyz, laıfhaktardan únemdeı alasyz.
- Jańa baǵyttardy ańdyp otyryńyz – alǵashynda bári arzan bolady.
Jolyńyz bolsyn!