Sáýirdiń toǵyzy kúni bıylǵy jyldyń alǵashqy naızaǵaıy oınap, kún kúrkirep, tolassyz jańbyr jaýdy
Sońǵy kúnderi jaýyn jıi kórinis berýde. Bir aýyq tyna qalyp, qaıta seldetip shyǵa keledi. Aıtpaqshy, sáýirdiń segizi kúni aqyryn ǵana sirkirep turǵan jańbyr erteńine shelektep quıyp berdi. Ol-ol ma, naızaǵaı oınap, kún kúrkiredi. Bul bıylǵy jylǵy kúnniń alǵashqy kúrkireýi edi...
Burynǵylardyń aıtýy boıynsha, kóktemde kún alǵash ret «Qyzyr qamshysy» kezinde kúrkireıdi. «Qyzyr qamshysy» amaly osy aıdyń 15-inen bastalady. Keıbir derekterde 17-18-inde kórinis beredi deıdi. Amal kezinde alǵashqy naızaǵaı oınap, jańbyr jaýyp, jer býsanady. Naızaǵaıdyń osy jarqylyn «Qyzyrdyń qamshysy shartyldady, qys ketti» dep sanaǵan. Keı jyldary bir-eki kúndik sýyq oryn alatyn bolǵan. Kók júzin jazdyń bulty qaptaıdy. Máshhúr Júsiptiń aıtýynsha, eskishe on besinshi naýryz Qyzyr İlıastyń qamshy silter kúni dep atalady. Áli ol kúnge eki aptadaı ýaqyt bar. Demek, bul kórinis kóktemniń erte kelgenin ańǵartsa kerek...
Nóser áli toqtar emes. Sál tynystap, sirkirep turady da, kókkóz doly jeńgeıdeı aıaqasty silkinip shyǵa keledi. Paıym boıynsha, jaýyn-shashyn jıi oryn alatyn, salqyndyq seziletin, ókpek jel órekpıtin kez osy.
Órik gúlin ashyp boldy. Biraq shıe men alma ázir jym-jyrt. Jerdiń kógi de kóteriler emes. Kún kózi kórinbeı, Almatynyń aspany ashylmaı tur.
«Sáýir kelip silkintti sanamyzdy,
Eńbek marshy qulpyrtty dalamyzdy.
Jer jahandy jaıqaltyp sán berse de,
Nurlantpady Almaty qala-qyzdy.
«Otamaly» amaly sirá, tynbaı,
Astan-kesten qarbalas bir basylmaı,
Birde jańbyr, birde qar, birde tuman...
Aspany Almatynyń tur ashylmaı!» degen jyr joldarynyń eriksiz ernińnen shyǵyp ketkenin baıqamaı da qalasyń.
Búgin sáýir aıynyń 11-shi juldyzy. Aı esebinshe, aıdyń 20-sy. Al qazaqy júıe boıynsha, sáýirdiń 8-jańasy. Apta aıdyń basyn da, ortasyn da, sońyn da qamtyp tur. Bul aptanyń qubylmaly bolatynyn bildirgendeı. Degenmen, ótken aptaǵa qaraǵanda jaýyn azaıatyn syńaıly.
Aldymyzda «Sáýir», «Qoıshy»,«Qusqanaty», «Tobylǵy jarǵan», «Besqonaq» amaldary kezegin kútip tur. Bári de jaýyn-shashyndy, jeli kóp, jeligi mol amal.
Aspan deneleri osylaı deıdi. Qalaı bolǵanda da aldymyz jaz ǵoı...
BABALAR BOLJAMY
Tabıǵat pen janýarlardyń qımylyna qarap jasalǵan joramal:
*Torǵaı erte jumyrtqalasa, kún erte jylynady.
*Kún kóp kúrkirese, egin, shóp mol shyǵady.
*Qarǵa qar sýyna shomylsa, kún jylynady.
*Tań kúńgirt tartyp, kún manaýrap kórinse, jyl jaýyn-shashyndy bolady.
*Tań shashyrap atsa, jyl berekeli bolady.
*Aı qoralansa, jaz jańbyrly bolady.
*Qoqıqaz byltyrǵy uıasyn jóndemeı jumyrtqalasa, jaz qurǵaq, jóndep, bıiktetse, jańbyrly bolady.