DSM munyń sebebin túsindirdi.
Densaýlyq saqtaý birinshi vıse-mınıstri Tımýr Sultanǵazıevtyń aıtýynsha, bıyl Qazaqstanda qyzylsha dertin juqtyrǵandar sany 11 myńnan asqan, dep habarlaıdy Almaty-akshamy.kz
«Jalpy syrtqanttanǵandardyń 83%-y – 0-14 jasqa deıingi balalar. Olardyń basym bóligi (85%-y) – ekpe almaǵan balalar. Almaty, Shymkent qalalarynda jáne Almaty, Jambyl oblystarynda másele óte ózekti. Vaksına almaǵandardyń basym bóliginiń ekpege qarsy kórsetilimi bar nemese keıbireýleri áleýmettik jelilerden burys aqparat kórip alǵan. Osyǵan baılanysty ekpe alýdan bas tartý deregi tirkeledi», - dedi Tımýr Sultanǵazıev Senattyń jalpy otyrysynan soń.
Sondaı-aq ol qyzylsha nege bul óńirlerde órshigenin túsindirdi.
«Bul aımaqtarda halyq tyǵyz qonystanǵan jáne týý koefısıenti joǵary. Sondyqtan qyzylsha juqtyrǵandar sanynyń ósýi baıqalyp otyr», - dedi birinshi vıse-mınıstr.
Tımýr Sultanǵazıevtiń pikirinshe, koronavırýs kezinde qyzylshaǵa qarsy ekpe salý jumysy júrgizilmegen. Saldarynan osyndaı másele týyndaǵan.
Qyzylsha dertin juqtyrǵandar sanynyń ósýi tek Qazaqstanda emes, álemde tirkelip otyr. Negizgi sebepterdiń biri, buryn aıtylǵandaı, koronavırýs kezinde basqa aýrýlarǵa qarsy vaksınanyń júrgizilmeýi, - dedi ol.
Búginde DSM jaǵdaıdy durystaý úshin balalarǵa ekpe salýǵa kirisken.
«Qazaqstannyń bas memlekettik sanıtar dárigeri Aıjan Esmamaǵambetova 6 aıdan 11 aıǵa deıingi sábılerge vaksına salý týraly sheshim qabyldady. Sonymen qatar 2 jastan 5 jasqa deıingi balalarǵa da qosymsha ekpe salynady», - dep túıindedi sózin Tımýr Sultanǵazıev.