Úsh kún ishinde fransýz delegasıasy Almatynyń birqatar joǵary oqý oryndaryn aralaıdy.
Qazaqstan men Fransıanyń joǵary oqý oryndarynyń ókilderi halyqaralyq ǵylymı yntymaqtastyqty damytý perspektıvalaryn anyqtap, Qazaqstanda jumys isteıtin fransýz kompanıalarynyń ınjenerler men tehnıkterge degen qajettiligi týraly aqparatpen bólisýdi, «Bolashaq» baǵdarlamalary men ǵylymı taǵylymdamadan ótý sharttary týraly kóbirek bilýdi, sondaı-aq Erasmus+ baǵdarlamasy aıasynda Fransıa ýnıversıtetteri men Qazaqstan ýnıversıtetteri arasyndaǵy yntymaqtastyq múmkindikterin talqylaýdy josparlap otyr, dep habarlaıdy Almaty-akshamy.kz.
Keshe Sátbaev Ýnıversıtetinde ótken dóńgelek ústel jıynynda Fransıa men Qazaqstannyń ǵalymdary men oqytýshylary geologıa jáne energetıka salasynda kadrlar daıarlaý boıynsha tájirıbe almasyp, aldaǵy yntymaqtastyq qarym-qatynastyń josparyn aıqyndady.
Fransıadaǵy I2EN ınjenerlik mektebiniń dırektory Karen Daıfýkýdiń oıynsha, eki eldiń joǵary bilim jáne ǵylym salasyndaǵy bolashaq yntymaqtastyq baılanysy stýdenttermen almasýdy jáne ózara ǵylymı is-áreketti yntalandyrýy kerek:
«Sátbaev Ýnıversıtetinde ıadrolyq ınjenerıa salasynda qos dıplomdyq bilim berý baǵdarlamasyn iske qosýǵa biz daıynbyz. Bul daryndy ınjenerlerge qajetti daǵdylardy meńgerýge jáne Qazaqstanda atom energetıkasyn damytýǵa septigin tıgizedi», - dedi Karen Daıfýký.
Fransıanyń Qazaqstan Respýblıkasyndaǵy Bas konsýly Fabrıs Nevó myrza óziniń jaýap sózinde qazaqstandyq jáne fransýz ýnıversıtetteri arasyndaǵy yntymaqtastyq qarym-qatynas odan ári damıtynyn atap ótti:
«Keshe Astanada Makron myrza qazaqstandyq joǵary oqý oryndarynyń stýdentterimen kezdesti. Bul fransýzdar men qazaqtardyń bilim men ǵylymǵa degen qushtarlyǵynda ortaq qasıet kóp ekenin kórsetedi», – dedi Nevó myrza óz sózinde.
Forým aıasynda Fransıa joǵary oqý oryndary ókilderiniń delegasıasy Almatyda NARXOZ ýnıversıtetiniń, ál-Farabı atyndaǵy Qazaq ulttyq ýnıversıtetiniń jáne Abaı atyndaǵy Qazaq ulttyq pedagogıkalyq ýnıversıtetiniń qyzmetimen tanysady.