Osy mekteptiń kúzetshisiniń oqýshyny zorlamaq bolǵanyn budan buryn habarlaǵanbyz.
Kúdiktiniń ústinen qylmystyq is qozǵaldy. Ol 15 kúnge qamaýǵa alynǵan
Oqý-aǵartý mınıstri Ǵanı Beısembaev mas kúzetshiniń oqýshy qyzǵa tıisý faktisinen keıin mektep dırektory qyzmetinen bosatylǵanyn málimdedi, dep habarlaıdy Almaty-akshamy.kz
"Tıisti sharalar qolǵa alyndy. Atalǵan bilim berý uıymynyń basshysy qyzmetinen qýyldy. Bilim basqarmasy tarapynan tıisti shara qabyldandy, tergeý júrip jatyr", - dedi Beısembaev.
Aıtýynsha, mınıstrlik osyndaı faktiler týraly estise, balalardyń quqyǵyn qorǵaý komıteti shuǵyl oqıǵa ornyna baryp, basqa memlekettik organdarmen tergeýge qatysady jáne sol máseleni turaqty baqylaýda ustaıdy.
Buǵan deıin BAQ-ta Almatydaǵy 160 mektepte kúzetshi 6-synyp oqýshysyna tıiskeni habarlanǵan bolatyn. Er adam oqıǵa kezinde mas bolǵan. Ol qyzdy qushaqtap, betinen súıe bastaǵan. Abyroı bolǵanda, bala qutylyp, qashyp úlgergen.