Almaty qalasynyń Jastar saıasaty basqarmasy men «Ulys» ǵylymı-zertteý ortalyǵy birlesip, «Táýelsizdik urpaqtary» grantyn taǵaıyndaý boıynsha konkýrstyń bastalǵanyn habarlady.
Baǵdarlama jastar bastamalaryn qoldaýǵa baǵyttalyp, 14 pen 35 jas aralyǵyndaǵy Almaty turǵyndaryna óz jobalaryn iske asyrý úshin 1 000 000 teńge kóleminde grant alý múmkindigin usynady.
Granttar alty baǵyt boıynsha beriledi:
- Ǵylym: jas ǵalymdardy jáne olardyń zertteýlerin qoldaý.
- Mádenıet: mádenı murany saqtaýǵa jáne nasıhattaýǵa arnalǵan jobalar.
- Aqparattyq tehnologıalar: sıfrlyq transformasıaǵa baǵyttalǵan jańa IT sheshimderin ázirleý.
- Bıznes: startaptar men bıznes-bastamalardy qoldaý.
- Medıa: jas urpaq úshin sapaly kontent jasaý.
- Volonterlik: áleýmettik máselelerdi sheshýge baǵyttalǵan bastamalar.
Uıymdastyrýshylardyń aıtýynsha, bul grant jastarǵa óz ıdeıalaryn júzege asyrýǵa jáne qala men eldiń damýyna úles qosýǵa biregeı múmkindik beredi.
«Jastarymyzdan shyǵarmashylyq ıdeıalar kútemiz jáne barshańyzdy granttyq konkýrsqa qatysýǵa shaqyramyz. Qatysýshylarǵa shabyt pen tabys tileımiz», - dedi Jastar saıasaty basqarmasynyń Jastardy áleýmettendirý jáne bastamalardy qoldaý bóliminiń basshysy Nursultan Bekkaıyrov.
Ótinimder 16 qyrkúıekten bastap 2024 jyldyń 16 qazanyna deıin qabyldanady. Jeńimpazdar 15 jumys kúni ishinde anyqtalady.
Ótinimder generationala.kz saıty arqyly qabyldanady. Qosymsha suraqtar boıynsha +7 (776) 844-12-02, +7 (776) 829-78-41 nómirlerine habarlasýǵa bolady.