Bul bastama respýblıkalyq onomastıka komısıasynyń qaraýyna usynylady.
17 jeltoqsanda Qyzyloda oblystyq máslıhat sesıasynda respýblıkalyq onomastıka komısıasynyń qaraýyna Qyzylorda oblysynyń bilim berý jáne mádenıet uıymdaryna ataý berý jónindegi usynystar qaraldy, dep habarlaıdy Almaty-akshamy.kz.
Oblystyq qoǵamdyq damý basqarmasynyń basshysy Mıra Qazbekova máslıhat depýtattaryna osy kúnge deıin óńirlik onomastıka komısıasynyń otyrystarynda qoldaý tapqan tıisti basqarmalardyń usynystaryn jetkizdi.
Atap aıtqanda, Qyzylorda oblystyq fılarmonıasyna kompozıtor Keńes Dúısekeevtiń, al Syrdarıa agrarly-tehnıkalyq kolejine Baldyrǵan Mustapaevanyń esimin berý usynyldy. Atalǵan bastamalar sesıa otyrysynda qoldaý taýyp, aldaǵy ýaqytta respýblıkalyq onomastıka komısıasynyń qaraýyna usynylady. Bul týraly Qyzylorda oblysy ákimdiginiń baspasóz qyzmeti habarlady.
Keńes Dúısekeev – Qazaqstannyń eńbek sińirgen óner qaıratkeri. 200-den astam shyǵarmanyń, onyń ishinde "Tolǵaý" sımfonıasynyń, "Jalańtós batyr" sımfonıa poema-kartınasynyń, "O, dúnıe" kantatasynyń, "Jyl mezgilderi" romanstar sıkliniń avtory. Onyń ánderin Roza Rymbaeva, Naǵıma Esqalıeva, Maqpal Júnisova sıaqty ánshiler oryndap júr.
"Gúlder" ansambliniń, "Qazaqkonsert" gastróldik-konsert birlestiginiń mýzyka jetekshisi, "Qazaq teledıdary" mýzyka redaksıasynyń bas redaktory, Qazaqstan memlekettik teleradıo komıteti estradalyq-sımfonıa orkestriniń kórkemdik jetekshisi jáne bas dırıjeri, "Qazaqkonsert" gastróldik-konsert birlestiginiń kórkemdik jetekshisi qyzmetterin atqarǵan.
Eńbektegi tabystary úshin "Qurmet", "Parasat" ordenderimen, "Qazaqstan Respýblıkasynyń eńbek sińirgen óner qaıratkeri" tósbelgisimen marapattalǵan.
Keńes Dúısekeev 2020 jylǵy 9 shildede ómirden ótti.