Jyl basyndaǵy meıramdarǵa baılanysty qala turǵyndarynyń basym kópshiligi demalǵanymen, shahardaǵy sharýashylyq bir kún de toqtaǵan joq. Jyl basynan-aq aýdan ákimdikteri óz mindetterin atqarýǵa kirisip ketti.
Bostandyq aýdanynyń ákimi Altaı Rahımbetov aýdan turǵyndarymen alǵashqy kezdesýin ótkizdi. Kezdesý №146 mektep-gımzanıasynda boldy. Oǵan Almaty qalasy máslıhatynyń depýtattary, qalalyq basqarmalardyń, prokýratýranyń, qalalyq Polısıa departamentiniń ókilderi, qoǵamdyq keńes músheleri men aýdan turǵyndary qatysty. Aýdan ákimi aýdannyń áleýmettik-ekonomıkalyq damýy týraly qysqasha baıandamasynan keıin, turǵyndardyń suraqtaryna jaýap berdi. Turǵyndar aýlany, kóshelerdi jóndeý, jaryqtandyrý, JMMN kóshý jáne aýlalardy qardan tazalaý syndy eń ózekti máselelerdi kóterdi.
Al Bostandyq aýdanyna kórshi Medeý aýdanynyń ákimi Erkebulan Orazalın eki qabatty meshittiń jóndeý jumystarynyń sońǵy kezeńin tekserdi. Aıta ketken jón, qurylys ornynda ishki árleý jumystary aıaqtalyp, nysan tapsyrýǵa daıyndalýda. Meshit Mámetova kóshesi, 1A mekenjaıynda ornalasqan.
Al Túrksib aýdanynda ınfraqurylymdy damytýǵa arnalǵan jobanyń júzege asyrylýy tekserildi. Jeltoqsan aıynda Saýranbaev kóshesindegi №59 mektep-gımnazıasyna qosymsha ǵımarat salý jáne qaıta jóndeý jumystary bastalǵan. Buǵan deıin «QazQSǴZI» AQ qorytyndysy boıynsha mektep apatty dep tanylǵan jáne eski mekteptiń jobalyq qýaty nebári 600 oryndy quraǵan.
Jumystar aıaqtalǵan soń, mekteptiń syıymdylyǵyn 900 oqýshyǵa deıin ulǵaıtý, 16-ǵa jýyq qosymsha oqý kabınetteri men zamanaýı qural-jabdyqtarmen jabdyqtalǵan sport zalyn ashý josparlanýda. Jobada, sondaı-aq úlken mektep asqanasyn jaılastyrý jáne abattandyrý qarastyrylǵan. Jumystardy aıaqtaý 2024 jyldyń 1 toqsanyna josparlanǵan.