Búgin Qazaq ulttyq qyzdar pedagogıkalyq ýnıversıteti men Qazaqstan shahmat federasıasy arasynda seriktestik týraly kelisimshartqa qol qoıyldy, dep habarlaıdy aqshamnews.kz.
Qujatty Qazaq ulttyq qyzdar pedagogıkalyq ýnıversıtetiniń Basqarma Tóraǵasy-Rektory Gúlmıra Qanaı men Qazaqstan shahmat federasıasynyń birinshi vıse-prezıdenti Darmen Kanatovıch Sadvakasov bekitti.
Kelisimshart aıasynda Qazaqstan shahmat federasıasynyń ádiskerleri men ýnıversıtet oqytýshylary birlesip ázirlegen «Shahmat boıynsha pedagog» Minor baǵdarlamasyn júzege asyrý máseleleri talqylandy. Bul biregeı baǵdarlama balalar men jastardy shahmatqa tıimdi úırete alatyn joǵary bilikti pedagogter daıarlaýǵa múmkindik beredi.
Shahmattyń bastaýysh synyptan bastap oqý úderisine engizilýi bilim alýshylardyń logıkalyq oılaýyn, strategıalyq josparlaý daǵdylaryn, jaǵdaıdy taldaý jáne durys sheshim qabyldaý qabiletterin damytýǵa yqpal etedi.
«Búgin Qazaq shahmat federasıasy men QyzPU arasynda seriktestik týraly kelisimshartqa qol qoıyldy. Kelisimshart aıasynda birqatar baǵyttar boıynsha yntymaqtastyq ornatýdy josparlap otyrmyz. Eń aldymen, osy ýnıversıtet bazasynda ádistemelik ortalyq ashýdy qalaımyz. Bul – bizdiń federasıamyzǵa shahmattyq bilim berý baǵdarlamasyn júzege asyrýǵa kómektesedi. Ata-analar men shahmattyń zıatkerlik qabiletti damytatynyn túsinetin jandar tarapynan úlken suranys bar. Sol sebepti osyndaı aýqymdy baǵdarlama júzege asyrylyp jatyr. Osyǵan baılanysty muǵalimderdi daıarlaý máselesi týyndaıdy. Biz QyzPU-dyń Qazaqstandaǵy pedagogıkalyq bilim berý salasyndaǵy flagmanǵa aınalǵanyn qalaımyz. Munda ádistemelik ortalyq quryp, mektepterimiz úshin muǵalimder daıarlaýdy birlesip júzege asyrýdy josparlap otyrmyz. Sonymen qatar aldaǵy ýaqytta pedagogıkalyq ýnıversıtetterdiń túlekteri bastaýysh synyp muǵalimi dıplomymen qatar «Shahmat pedagogy» sertıfıkatyn da alady. Bul sertıfıkat bastaýysh bilim berý muǵalimderine mektepterde «Shahmat» pánin varıatıvtik pán retinde júrgizýge múmkindik beredi. Taǵy bir mańyzdy másele – arnaıy alań qurý. Biz ýnıversıtet aýmaǵynda Kaz Chess Lab ortalyǵyn osy jyldyń kúzine deıin ashý týraly kelisimge keldik. Bul ortalyqta mamandar jumys istep, stýdentter shahmat oınaıdy, sondaı-aq ádistemelik bólim bolady – ıaǵnı, mamandar baǵdarlamalardy ázirlep, olardy túzetip, oryndalýyn qadaǵalaıdy. Osylaısha, biz birlesken aýqymdy jobany júzege asyrýdy josparlap otyrmyz», – dedi Qazaqstan shahmat federasıasynyń birinshi vıse-prezıdenti Darmen Kanatovıch Sadvakasov.
Qazaq ulttyq qyzdar pedagogıkalyq ýnıversıteti men Qazaqstan shahmat federasıasynyń birlesken jumysy balalar men jastarǵa shahmat úıretýdiń sapasyn arttyrýǵa baǵyttalǵan. Bul bastama bilim berý júıesiniń jańa deńgeıge kóterilýine jáne shahmattyń el ishinde keńinen tanymal bolýyna óz septigin tıgizeri sózsiz.