Qazaqstan Respýblıkasy Prezıdentiniń Jarlyǵymen eldiń áleýmettik-ekonomıkalyq jáne mádenı damýyna qosqan úlesi úshin birqatar azamat memlekettik nagradalarmen marapattaldy. Olardyń qatarynda Qazaq ulttyq qyzdar pedagogıkalyq ýnıversıtetiniń profesorlary Aınagúl Ershına men Dına Abdykadyrova bar, dep habarlaıdy aqshamnews.kz.
Aınagúl Qapasqyzy Ershına – fızıka-matematıka ǵylymdarynyń doktory, profesor. Jarty ǵasyrǵa jýyq ǵylymı-pedagogıkalyq qyzmetinde jylýfızıka, gıdroaeromehanıka salalary boıynsha zertteýler júrgizip, jel týrbınalarynyń aerodınamıkalyq sıpattamalaryn jetildirýge eleýli úles qosty. 150-den astam ǵylymı maqalanyń, birneshe oqýlyq pen ónertabysqa patenttiń avtory. Ǵylymı eńbekteri Scopus bazasynda ındekstelgen.
Profesor QR Prezıdentiniń halyqaralyq «Bolashaq» stıpendıasynyń ıegeri. Sondaı-aq, Q.I. Sátbaev atyndaǵy İ syılyqtyń, «Qazaqstan ǵylymyn damytýǵa sińirgen eńbegi úshin» tósbelgisiniń, «Ulaǵat» kúmis medaliniń ıegeri. 2024 jyly QR Ulttyq ǵylym akademıasynyń Qurmet gramotasymen marapattaldy.
Dına Rahımovna Abdykadyrova – pedagogıka ǵylymdarynyń kandıdaty, profesor, 50 jyldan astam eńbek ótili bar tájirıbeli maman. Ol dene shynyqtyrý jáne sport salasynda 50-den astam ǵylymı maqala men ádistemelik quraldar ázirledi. Uzaq jyldar QyzPU Dene shynyqtyrý jáne sport kafedrasyn basqaryp, Azıa, Álem jáne Olımpıada chempıondaryn tárbıeledi.
Ǵylym men bilimge sińirgen eńbegi úshin «Y. Altynsarın» tósbelgisimen, «Qazaqstan Respýblıkasynyń bilim berý isiniń qurmetti qyzmetkeri» belgisimen, «Qurmet belgisi» medalimen marapattalǵan. 2002 jyly Halyqaralyq ǵylymı-pedagogıkalyq bilim akademıasynyń korespondent-múshesi, al 2009 jyly QyzPU akademıalyq profesory atandy.
QyzPU profesorlaryn memlekettik marapatpen quttyqtaımyz! Eńbekterińiz elene bersin, abyroılaryńyz arta bersin!