Qazaqstan men Ázerbaıjan joǵary bilim salasyndaǵy yntymaqtastyqty keńeıtýge baǵyttalǵan mańyzdy qadam jasady. Ázerbaıjannyń ADA ýnıversıtetinde Ázerbaıjan men Qazaqstan arasyndaǵy joǵary bilim salasyndaǵy yntymaqtastyqty keńeıtýge arnalǵan dóńgelek ústel uıymdastyryldy, dep habarlaıdy aqshamnews.kz
İs-shara barysynda Qazaqstan Respýblıkasynyń Ǵylym jáne joǵary bilim mınıstri Saıasat Nurbek, Ázerbaıjannyń Ǵylym jáne bilim mınıstri Emın Amrýllaev, sondaı-aq eki eldiń joǵary oqý oryndarynyń rektorlary bas qosty.
QR Ǵylym jáne joǵary bilim mınıstri Saıasat Nurbek eki el arasyndaǵy joǵary bilim men tehnologıalar salasyndaǵy yntymaqtastyq úshin jańa múmkindikter ashylǵanyna toqtaldy. Saıasat Nurbek Ázerbaıjan men Qazaqstan arasyndaǵy baýyrlastyq qatynastar bilim berý jáne ǵylymı yntymaqtastyqta da óz kórinisin tabýy tıis ekenin aıtty. Mınıstr qazirgi tańda eki eldiń joǵary oqý oryndarymen seriktestik jospary men ınovasıalyq tásilderdi júzege asyrý boıynsha jumystar júrgizilip jatqanyn atap ótti. Ázerbaıjan Respýblıkasynyń Ǵylym jáne bilim mınıstri Emın Amrýllaev Ázerbaıjan men Qazaqstan arasynda bilim salasyndaǵy yntymaqtastyqty damytý mańyzdy ekenin aıtty.
Dóńgelek ústel barysynda 40 memorandýmǵa qol qoıyldy, oǵan eki eldiń 17 ýnıversıtetiniń ókilderi qatysty.
QyzPU delegasıasy Basqarma tóraǵasy – rektor Gúlmıra Qanaıdyń basshylyǵymen Ázerbaıjan Memlekettik pedagogıkalyq ýnıversıtetiniń rektory Djafar Djafarovpen jáne Baký Eýrazıa ýnıversıtetiniń rektory Saıavýsh Gasymovpen kezdesip, yntymaqtastyqty damytýǵa baǵyttalǵan memorandýmdarǵa qol qoıdy.
Memorandýmdar ýnıversıtetter arasyndaǵy áriptestikti nyǵaıtyp, akademıalyq utqyrlyq baǵdarlamalary men bilim almasý múmkindikterin keńeıtýdi kózdeıdi. Taraptar joǵary jáne joǵary oqý ornynan keıingi bilim, ǵylym men mádenıet, ǵylymı-zertteý salasyndaǵy yntymaqtastyqty damytýǵa ýaǵdalasty.
Bul kelisimder stýdentter men oqytýshylardyń ózara tájirıbe almasýyna, birlesken ǵylymı jobalardy júzege asyrýǵa jáne bilim sapasyn arttyrýǵa tyń serpin beredi. Sonymen qatar akademıalyq utqyrlyq baǵdarlamasy jastarǵa halyqaralyq deńgeıde bilim alyp, mádenı tájirıbe jınaqtaýǵa múmkindik jasaıdy.
4-5 naýryz aralyǵynda Baký qalasynda «Study in Kazakhstan» sheteldik jastardy Qazaqstanda bilim alýǵa shaqyrýǵa arnalǵan jármeńke ótti. Qazaqstan men Ázerbaıjannyń bilim berý salasyndaǵy yntymaqtastyǵy bolashaqta da nyǵaıa túspek.
