Almaty akademıasynda Qazaqstannyń túkpir-túkpirinen kelgen ishki ister organdarynyń qyzmetker áıelderin biriktiretin dástúrli "Kóshbasshy áıel" forýmy ótti.
Forýmǵa qatysýshylar – quqyq qorǵaý salasynda aıtarlyqtaı jetistikke jetken, qoǵamdyq qaýipsizdikti qamtamasyz etýde mańyzdy ról atqaratyn bilikti mamandar, dep habarlaıdy aqshamnews.kz Polisia.kz-ke silteme jasap.
Bul forým – kásibı tájirıbe almasýǵa, jańa bilim men daǵdylardy ıgerýge, iskerlik baılanystardy keńeıtýge múmkindik beretin biregeı alań. İs-shara aıasynda trenıńter, sheberlik sabaqtary, pikirtalas alańdary uıymdastyrylyp, akademıa boıynsha tanystyrý ekskýrsıalary ótkizildi. Degenmen, eń bastysy – forým aıasynda ashyq suqbat qurý arqyly áıelderdiń ishki ister júıesindegi róline qatysty ózekti máselelerdi talqylaý múmkindigi.
- Qazirgi tańda ishki ister organdaryndaǵy áıelder mańyzdy qyzmetterdi atqaryp, quqyqtyq tártipti qamtamasyz etýge ólsheýsiz úles qosyp keledi. Olar jedel-izdestirý salasynan bastap, ákimshilik basqarý, profılaktıkalyq jumystar, azamattardyń quqyqtaryn qorǵaý jáne qoǵamdyq tártipti saqtaý baǵytynda tabysty eńbek etip júr. "Kóshbasshy áıel" forýmy – jaı ǵana kezdesý emes, bul – kásibı damýǵa, kóshbasshylyq qabiletterdi shyńdaýǵa jáne ujymdyq rýhty nyǵaıtýǵa arnalǵan myqty alań, – dep atap ótti QR İİM Almaty akademıasy bastyǵynyń orynbasary Janat Dılbarhanova.
Pogondaǵy áıelder mundaı sharalardyń qoǵamdaǵy oń ózgeristerdiń qozǵaýshy kúsh ekenine senimdi, sondaı-aq tek kadrlyq áleýetti nyǵaıtýǵa jáne kásibı ósýge jaǵdaı jasaýǵa ǵana emes, sonymen qatar áıelderdiń ártúrli salalarda ózin-ózi damytýyna múmkindik beredi. Birlese jumys isteý arqyly olar qoǵamda ádilettilik pen teńdikti nyǵaıtyp, bilim men áleýmettik qorǵalýdy arttyryp, bolashaq urpaqty basqarý, bıznes, ǵylym, saıasat jáne qoǵamdyq qyzmetke belsendi qatysýǵa jigerlendiredi. Birin-biri qoldap, yntymaqtastyqty arttyrý arqyly kóshbasshy áıelder tutas qoǵam úshin úılesimdi ári turaqty bolashaq qalyptastyrýǵa yqpal etedi.