Qyz − ómirdiń gúli, barlyq adamzattyń qadirlep, aıalaıtyn asyl arýy desek te artyq emes. Otbasynda bir emes, jeti qyzdy tárbıelep otyrǵan Nurdáýlet pen Aıgerim Qaraýylbaevtardyń januıalyq ómiri - kópke úlgi. Olar áleýmettik jelide belsendi blog júrgizip, otbasylyq trendterden qalys qalǵan emes. 15 mamyr - Otbasy kúnine oraı Aqshamnews.kz tilshisi erekshe otbasynyń áńgimesin tyńdady.
Nurdáýlet Qalymbetuly pen Aıgerim Qalıjanqyzynyń tanysýy da, otbasyn qurýy da erekshe. Olar 2010 jyly áleýmettik jeli arqyly sóılesip júrgen. Birneshe aılyq dostyqtan keıin aradaǵy sezim mahabbatqa ulasyp, 2011 jyly naýryz aıynda otbasyn qurady. Búginde olar Shymkent qalasynda turady. Aıgerim – dekrettegi ana, al jubaıy bedeldi kompanıada jumys isteıdi.
«Qyz bala dep renjigen emespiz»
Nurdáýlet pen Aıgerim Qaraýylbaevtar otbasynda jeti qyz ósip keledi: Káýsar, Janerke, Jasmın, Gaýhar, Balaýsa, Arýna jáne Ádemi esimdi “jeti juldyz” bar. Tuńǵyshy dúnıege kelgende Aıgerim ózi de jas ana bolǵandyqtan, onymen birge eseıip, ana bolýdy úırengenin áńgimelep berdi.
«Biz eshqashan qyz bala dep renjigen emespiz. Joldasym da ul bolmady dep kóńil túsirgen emes. Qaıta qyzdaryn óte jaqsy kóredi. Iá, “múmkin ul shyǵar?” degen oılar bolǵan, biraq Allanyń bergenine shúkir dedik», – deıdi Aıgerim Qalıjanqyzy.
Qyzdarynyń esimderin kóbine joldasynyń ata-anasy men ápkeleri qoıǵan. Tek eń kishkentaılary – Arýna men Ádemige esimderdi ata-anasy ózderi tańdaǵan.
«Jeti juldyz» blogy qalaı bastaldy?
Otbasymen birge tabıǵat aıasyna serýendeýdi, basqa qalalarǵa saıahat jasaýdy jaqsy kóretin januıa 2024 jyly Túrkistanǵa sapar shegip bara jatyp, otbasylyq vıdeolaryn YouTube jelisine jarıalaýǵa bel býǵan. Osylaısha «Jeti juldyz» atty blog júrgizetin arna jaryq kóredi.
«Búginde YouTube-ta 54 myń, TikTok-ta 92 myń, Instagram-da 27 myń kórermenimiz bar. Alǵashynda tek chellendj túsirsek, keıin otbasylyq qundylyqtardy nasıhattaıtyn, tárbıelik máni bar vıdeolar túsirýge kóshtik», – deıdi anasy.
Olardyń vıdeolarynda, ásirese, ákeniń qyzdaryna degen erekshe mahabbaty kórinis tabady. «Qyz bala rasymen ákesine erekshe jaqyn bolady eken», – deıdi ol.
“Qyz tárbıesi – ulttyń tárbıesi”
Aıgerim Qalıjanqyzy úshin qyz tárbıesi – úlken jaýapkershilik pen meıirimniń úılesimi. Ol qyzdaryn erkeletip ósirip, bala kezindegi balalyq shaqtaryn tolyq sezinýge múmkindik berýge tyrysady.
«Bastysy – jaqsy adam bolyńdar, bilimdi bolyńdar, alǵys alyńdar dep tárbıelep otyramyz. Ónerden de qur qalmasyn dep, dombyra úıirmesine de qatysýlaryna múmkindik beremiz», – deıdi ol.
Qyzdar úı sharýasyna da qolǵabys etedi. Dese de, anasy qyzdarymen qurbysyndaı aralasatynyn aıtty.
Qyz – bolashaqtyń irgesi
Aıgerim hanym óz sózinde qazaq halqynyń qyz balaǵa degen qurmeti erekshe ekenin aıtty.
«Qazaq árdaıym qyzdy joǵary orynǵa qoıdy. Qyzǵa tórden oryn berip, únemi syı-qurmetke bóleıtin. Baýyrjan Momyshuly atamyz aıtpaqshy: "Jer betindegi eń batyr adam ol - qyz. Men qansha batyr bolsam da, bóten, tanymaıtyn elge bir saǵat ta turǵym kelmeı qashamyn. Al, qyz bolsa, barǵan jerinde jalǵyz ózi ómirinde kórmegen, tanymaıtyn adamdarmen til tabysyp, sol eldi biriktirip el de qyla alady, syılata da alady, alysa da alady, qaımyqpastan urpaǵyn da kóbeıtip, sol eldi jeńip, máńgi bıleıdi”, - degen eken. Sol sıaqty qyz balanyń tárbıesine kez kelgen otbasy úlken jaýapkershilikpen qaraý kerek», – deıdi Aıgerim.