Elektrondy komersıanyń qarqyndy damýy transshekaralyq saýda-sattyqty aıtarlyqtaı tıimdi ári qoljetimdi etti. Bul salanyń damýy álemdegi naryqtardy da biriktire tústi. Qazirgi tańda kóptegen elderdiń azamattary qytaılyq elektrondy komersıa platformalarynan túrli ónimder satyp alyp, álemdik naryqqa erkin qol jetkizip otyr. Elektronıkadan bastap kıim-keshek, turmystyq tehnıka men aksesýarlarǵa deıingi keń aýqymdy taýarlar qoljetimdi. Bul qubylystyń basty sebebi – qytaılyq ınternet-dúkenderdiń tartymdy baǵa men aýqymdy assortıment usynýynda. Olar tutynýshylarǵa álemniń kez kelgen túkpirinen qajetti ónimderdi tez ári jeńil satyp alý múmkindigin beredi.
Degenmen, bul úderis ózimen birge jańa qıyndyqtardy da ala keldi. Qytaılyq marketpleıster, ásirese Temu, Pinduoduo jáne Taobao platformalary álemdik naryqta ústemdikke ıe bola otyryp, jergilikti shaǵyn jáne orta bızneske qysymdy kúsheıtti. Bul marketpleıster ózderiniń tómen baǵalary men únemi usynatyn jeńildikteri arqyly tutynýshylardyń nazaryn jaýlap alyp, dástúrli saýda kásipkerlerin naryqtan yǵystyrý ústinde. Qazirgi tańda bul proses tolyqtaı júzege aspaǵanymen, ol kezeń-kezeńimen oryn alýy ábden múmkin.
Qytaılyq marketpleıster qazirgi ýaqytta ınovasıalyq saýda úlgilerin usynýda. Bul óz kezeginde álemdik naryqqa tez enýine múmkindik berip otyr. Mysaly, Pinduoduo platformasy tutynýshylar óz keregin satyp ala otyryp qosymsha jeńildikter usynyp, yntalandyrady. Temu platformasy arzan baǵamen taýar usynyp, jetkizý qyzmetin tegin kórsetýmen naryqty baýraıdy. Bul tásilder platformalardyń qoldanýshylar sanyn arttyrýda úlken ról atqaryp otyr. Osy arqyly qytaılyq saýda saıttary álemdik naryqta keńinen tanylyp úlgerdi. AQSH, Eýropa, Ońtústik-SHyǵys Azıa, tipti Qazaqstan sıaqty damýshy elderde de úlken suranysqa ıe.
Atalǵan platformalardyń úlken naryqqa shyǵýyna múmkindik bergen eń negizgi artyqshylyǵy qandaı? Eń aldymen, qoljetimdi baǵa usynýyn ataýǵa týra keledi. Tómen baǵa kez kelgen eldegi naryqta basty ról oınaıdy. Ekinshi orynda túrli marketıń tásilder, ıaǵnı udaıy uıymdastyrylatyn jeńildikter men aksıalar. Bul marketıńtik naýqandar adamdardyń tutynýshylyq yntasyn oıatýǵa barynsha paıdalanylyp jatyr. Platformalardyń taǵy bir basty artyqshylyǵy – joǵary sapadaǵy logıstıka. Qytaı úkimeti logıstıkalyq ınfraqurylymǵa úlken ınvestı-
sıalar quıyp, jahandyq jetkizý jelisin tıimdi uıymdastyrdy. Bul saýda platformalarynyń halyqaralyq naryqta básekege qabiletti bolýyna zor áser etýde.
Atap ótkenimizdeı, bul jańa saýda tarmaqtary ár eldegi shaǵyn jáne orta bızneske keri áserlerin tıgizýde. Platformalardaǵy taýarlardyń arzan baǵalary jergilikti kásipkerlerdi baǵany tómendetýge májbúr etti. Bul óz kezeginde olardyń marjasynyń azaıýyna jáne qarjylyq qıyndyqtarǵa ákelýi múmkin. Óz marketıńtik strategıalaryna mıllıardtaǵan dollar jumsaǵan qytaılyq platformalarmen jergilikti orta-shaǵyn bıznestiń básekelesýi qıyn. Degenmen, bul elimizde orta-shaǵyn bıznestiń jańa qyrynan damýyna da óz áserin berip jatqanyn kóre alamyz. Aıtalyq, otandyq kásipkerler eldiń tıimdi artyqshylyqtaryn paıdalanyp, logıstıkalyq qyzmet túrlerin damytýǵa múmkindik alǵandaı. Sala ókilderiniń pikirine nazar aýdaryńyz.
Taqyrypqa oraı
İnjý QANAT, Qytaımen saýda jasaıtyn jeke kásipker:
Bul saıttardyń kemshilikterinen góri artyqshylyqtary áldeqaıda kóp. Sebebi, osy platformalar Qazaqstanǵa kelgennen beri kóptegen adamdar úshin jańa tabys kózderi ashyldy. Jeke kásippen aınalysqysy kelgender osy saıttardy paıdalaný arqyly, ózderiniń tasymaldaýshy kargolaryn uıymdastyryp, ózderiniń bıznesterin bastap ketti. Men bul salany alǵash ret YouTube arqyly úırenip, aqsha taba bastadym. Shaǵyn qalada turyp ta, úıde otyryp bastaǵan shaǵyn bıznesim qazir jaqsy damyp keledi. Jáne de joǵary nátıjeler kórsetkishiniń arqasynda ortalyqtan jeke qoımamdy ashtym. Bastapqyda taýardy kútý merzimi bir-eki aıǵa deıin sozylatyn, al qazir eki apta ishinde adamdar óz tapsyrystaryn qoldaryna alady. Bolashaqta dástúrli saýdadan góri onlaın saýdanyń úlesi aıtarlyqtaı artyp, osy baǵytta jumys isteıtinderdiń sany odan ári kóbeıetinine senimdimin.
Habdı Arýjan Muratbekqyzy: JANA post kompanıasy marketıń bólimniń SMM mamany:
JANA Post Qytaı Halyq Respýblıkasynyń kez kelgen núktesinen sálemdemelerdi deldalsyz, jyldam ári arzan túrde jetkizip keledi. Qazaqstandyqtarǵa osyndaı qyzmet kórsetip kele jatqanyna bir jylǵa jýyq ýaqyt ótti. JANA Post arqyly Qytaı saıttarynan taýar satyp alǵan árbir adamǵa tıimdi usynystar men jeńildikter qoljetimdi. Munda klıentter bonýstar, premıým taýarlardy arzan baǵada alý sıaqty kóptegen múmkindikterge ıe bola alady. Qazir otandyq kompanıamyz Ortalyq Azıa men álemniń ózge elderi men aımaqtaryn baılanystyryp, taýarlardyń jyldam ári senimdi jetkizilýin qamtamasyz etýge tyrysýda.
Bizdiń negizgi maqsatymyz – Qazaqstan logıstıkasyn sıfrlandyrý. Bul sala bizdiń naryqta paıda bolǵan kezden bastap qarqyndy túrde zańdastyrylyp jatqanyn atap ótkim keledi. Buǵan deıin qazaqstandyqtar taýarlardy zańsyz tasymaldaýshylar arqyly shaǵyn pakettermen alyp kelse, qazirgi tańda osy nıshany tolyǵymen zańdy túrde Jana Post kompanıasy alyp otyr. Bul bizdiń memleketimizdiń ál-aýqaty men gúldenýi úshin óte mańyzdy.