Jarysqa 19 kolejdiń komandalary qatysyp, 7 túrli sport túrinen saıysqa tústi
9 qańtar kúni bastalǵan Almaty qalasy memlekettik kolejderiniń oqytýshylary men qyzmetkerleri arasynda ótken qalalyq 28-spartakıada óz máresine jetti. Jarysqa 19 kolejdiń komandalary qatysyp, 7 túrli sport túrinen saıysqa túsken bolatyn. Atap aıtqanda, basketbol, shahmat (shashki), toǵyzkumalaq, ústel tenısi, voleıbol, fýtbol jáne ulttyq oıyndar (asyq atý, darts, buqa tartys, arqan tartys).
Bilim basqarmasyna qarasty Qalalyq deneshynyqtyrý jáne oqý-tájirıbelik ortalyǵynyń sport ádiskeri Nurǵalı Orynǵalıevtiń aıtýynsha, spartakıada ulttyq sport túrlerin tanymal etý, salaýatty ómir saltyn nasıhattaý, Almaty qalasy kolejderi oqytýshylarynyń arasynda dostyq qarym-qatynasty nyǵaıtý maqsatynda uıymdastyryldy.
– Spartakıada joǵary deńgeıde ótti, óte tartysty jarys boldy. Ózin jaqsy kórsete bilgen ujymdar jeńiske jetti. Endi respýblıkalyq dárejede kolej stýdentteri arasynda jarys ótkizýdi josparlap otyr. Al osy qalalyq spartakıadada úzdik bolǵan adamdar iriktelip, respýblıkalyq jarysqa jiberiledi. Jalpy, bul sporttyq is-sharalarymyz kolej muǵalimderi men qyzmetkerlerine unady dep oılaımyz. Olar osyndaı is-sharalardan sergip, jiger-kúsh alady. Koll edj stýdentteri úshin de ustazdarynyń osyndaı jarystarda jeńiske jetýi serpin beredi, – dedi Nurǵalı Orynǵalıev.
Spartakıada nátıjesi boıynsha jalpykomandalyq birinshi orynǵa Almaty energetıka jáne elektrondy tehnologıalar koleji ıe boldy. Ekinshi satydan Almaty kólik jáne komýnıkasıalar koleji kórindi. Jalpykomandalyq úshinshi oryn Almaty polıtehnıkalyq kolejine buıyrsa, Almaty memlekettik servıs jáne tehnologıa koleji 4-orynǵa jaıǵasty.
– Bul jarys jyl saıynan negizinen erler arasynda ótetin. Biraq bıyl spartakıadaǵa qyzdar da qosyldy. Jalpy, er jigitter 5 sport túrinen, qyzdar 3 sport túrinen baq synady.
Sondaı-aq, ulttyq sport túrlerine erekshe kóńil bólindi. Barlyǵy 7 sporttúriniń tórteýinen Almaty energetıka jáne elektrondy tehnologıalar koleji jeńiske jetip, osylaısha jalpykomandalyq birinshi orynǵa ıe boldy, – dedi Almaty energetıka jáne elektrondy tehnologıalar koleji dırektorynyń tárbıe isi jónindegi orynbasary Asqat Janbosynov.
