Almatyda «Jol júrisi týraly» Zańǵa engizilgen ózgeristerge sáıkes mopedterdi tirkeý bastaldy. Bul týraly Óńirlik komýnıkasıalar qyzmetinde ótken brıfıńte Almaty qalasy Polısıa departamenti ákimshilik polısıa basqarmasynyń Prosesıng ortalyǵynyń basshysy Aıdyn Merkimbaev málim etti, dep habarlaıdy aqshamnews.kz
Bıylǵy jyldyń 11 qańtarynan bastap moped ıeleri tirkeý rásiminen jeńildetilgen tártippen óte alady. QR İshki ister mınıstrligi qajetti qujattardyń tizbesin ázirledi. Mopedtiń jaqtaýynda sáıkestendirý nómiri bolmasa da tirkeýge ruqsat etiledi. Elimizdegi alǵashqy tirkelgen eki dóńgelekti kólik ótken aptada Almatyda tehnıkalyq pasport pen memlekettik tirkeý nómirin aldy.
Qazirdiń ózinde qalada 60 moped resmı tirkeýden ótken. Polısıa moped ıelerine arnalǵan aqparattyq jadynamalar men qujattar tizimi kórsetilgen kitapshalardy taratýda. Materıaldar transport ıeleri kóp jınalatyn jerlerde, sondaı-aq buqaralyq aqparat quraldary men áleýmettik jeliler arqyly qol jetimdi.
2025 jyldyń 5 sáýirinde kúshine enetin jańa zańnamalyq túzetýlerge sáıkes, mopedter mehanıkalyq avtokólikterge teńestiriledi. Mundaı kólikti paıdalanýǵa polısıada tirkeýden ótken jaǵdaıda ǵana ruqsat etiledi. Sonymen qatar, moped ıeleri A1 sanatyndaǵy júrgizýshi kýáligin alýy tıis.
Aıdyn Merkimbaevtyń aıtýynsha tirkeý eksaýmaqtyq qaǵıdaty boıynsha júzege asyrylady jáne barlyq moped ıeleri úshin prosesti jeńildetedi. Almaty polısıasy zańnama talaptaryn saqtaýdyń mańyzdylyǵyn eske salyp, júrgizýshilerdi bolashaqta bolýy múmkin quqyq buzýshylyqtardyń aldyn alý úshin tirkeý rásiminen ýaqtyly ótýge shaqyrady.