40 jyldan beri ótkizilip kele jatqan jańajyldyq keshte eki qandasymyz óner kórsetti.
Qytaıdyń ulttyq CCTV telearnasyndaǵy «Spring gala festival 2023» saýyq keshin 655 mıllıonnan astam adam tamashalady, dep habarlaıdy Almaty-akshamy.kz Sınhýa agenttigine silteme jasap.
21 qańtar saǵat 24:00-degi jaǵdaı boıynsha, «Spring gala festival 2023» keshi tikeleı translásıasyn Qytaı boıynsha 655 mıllıonnan astam adam tamashalaǵan. Al CCTV arqyly shoýdy kórýshiler sany 108 mıllıonnan asyp túsken. Ózge elderde CGTN arnasy arqyly 36 mıllıonnan astam adam konserttik baǵdarlamany kórgen.
Bıylǵy konserttik baǵdarlamanyń betashar nómiri «Gúlder» ánin qandasymyz Rıza Álimjanqyzy Djekı Chan, Ý Daszın sekildi óner-sport juldyzdarymen birge oryndady. Rıza Álimjanqyzy byltyr Qytaıdyń teleóner salasyndaǵy eń joǵary memlekettik marapat Flying Apsaras syılyǵyn jeńip alǵan bolatyn. Sondaı aq, az ulttar oryndaǵan «Bizdiń aýyl» ánin Altaı aımaǵynyń ónerpazy Arshyn Baqatqyzy qobyzben súıemeldedi.
CCTV-diń dástúrli merekelik jańa jyl keshi - Qytaıdaǵy eń mártebeli jáne kórermeni eń kóp telebaǵdarlamalardyń biri. Bul konsertte óner kórsetý QHR óner juldyzdary úshin úlken mártebe bolyp sanalady.