Soltústik Qytaıdyń Shansı provınsıasyndaǵy Taıýan qalasynan Almatyǵa alǵash ret júk ushaǵy júk jetkizdi. Bul týraly Taıýan qalasy ákimdiginiń saıty jazdy, dep habarlaıdy aqshamnews.kz,
Boeing 737-800 ushaqtarymen Tianjin Cargo Airlines kompanıasy qyzmet kórsetetin turaqty jetkizilimderdiń alǵashqysy. Jańa avıareıster aptasyna eki ret, dúısenbi jáne juma kúnderi oryndalatyn bolady.
Shanxi Airport Logistics Co Ltd halyqaralyq bıznes bóliminiń dırektory Lı Haıbınniń aıtýynsha, júk charterlik reısteriniń ashylýymen tasymaldaýdyń jalpy tıimdiligi 60%-ǵa artty, logıstıkalyq shyǵyndar 30%-ǵa azaıdy.
Qytaı kedeniniń málimetine sáıkes, alǵashqy júk ushaǵy kúndelikti qajettilikke arnalǵan taýarlar men avtobólshekterdi jetkizgen. Aldaǵy ýaqytta osy baǵyt boıynsha tasymaldanatyn júk ataýlarynyń sany artýy kútilýde.
Jańa avıabaǵyt avtomobıl zapchastarymen, jańa energetıkalyq ónimdermen, elektronıkamen jáne medısınalyq jabdyqtarmen Qazaqstan men Ortalyq Azıanyń basqa elderine júk tasymaldaýǵa úlken múmkindikter ashady.