Shymkentte Qytaıdyń dárilik ónimderin tutynǵan 54 jastaǵy turǵyn jansaqtaý bóliminen bir-aq shyqqan. Oǵan alergıalyq shok dıagnozy qoıylǵan, dep habarlaıdy almaty-akshamy.kz Otyrar.kz-ke silteme jasap.
27 qarashada 54 jastaǵy áıel №2 qalalyq aýrýhanaǵa jetkizildi. Naýqastyń jaǵdaıy aýyr bolǵandyqtan, ol jansaqtaý bólimine jatqyzyldy. Áıeldiń búkil denesinde irińdi bórtpeler paıda bolǵan. Dene qyzýy kóterilip, basy aýyryp, júregi aınyǵan.
"Naýqas Qytaıdyń túrli dárilerin iship, jaqpa maılaryn qoldanǵan. Ol zattardy tutynǵanyna tórt kún bolǵanda alergıa belgileri baıqalǵan. Aýrýhanaǵa jatqyzý kezinde áıeldiń jaǵdaıy aýyr dep baǵalandy. Dene terisiniń 90% zaqymdanǵan. Bet pen denesi isip ketken", - deıdi dáriger.
Naýqas eki apta boıy jansaqtaý bóliminde em qabyldaǵan. Onyń qanyna gemofıltrasıa jasalyp, tazartylǵan. Nátıjesinde áıeldiń jaǵdaıy jaqsaryp, terisi tolyǵymen qalpyna kelgen.