Qystaı kıgen qalyń kıimderdi jınaıtyn ýaqyt keldi.
Kelesi qysqa deıin kıimder jaqsy kúıde bolýy úshin olardy durys tazartý jáne saqtaý mańyzdy. Jańa maýsym aldynda qysqy garderobty retteýge kirisken bolsańyz, sizge qajet bolatyn birneshe bazalyq erejeler bar, dep habarlaıdy Almaty-akshamy.kz Elorda.info-ǵa silteme jasap.
1. Maýsym sońynda súıikti paltońyzda usaq aqaýlar bar-joǵyn tekserińiz. Mysaly, ilgekteri bosap qalǵan nemese qaltanyń ishi jyrtylǵan bolýy múmkin. Olardy kıimdi salyp tastar aldynda jóndep nemese tigip qoıǵan jón. Eger maýsym boıy paltony jıi kıgen bolsańyz, ony hımıalyq tazalaýǵa tapsyrýǵa bolady.
2. Paltony búktep jınamaı, kıim ilgishke ilip saqtaǵan durys. Palto pishinin joǵaltpas úshin oǵan aýa ótetin mata qap pen ushtary dóńgelektelgen jalpaq kıim ilgish alǵan jaqsy.
3. Qysqy kúrtkeni salyp tastar aldynda mindetti túrde ony jýyp alý kerek. Kúrtke zattańbasyndaǵy kútimge qatysty aqparatty zertteńiz. Sebebi keı kúrtkelerdi kir jýǵysh mashınaǵa jýý usynylmaıdy. Kıim kepkenshe, ony arasynda silkip alyp turyńyz, áıtpese, mamyq bir jerge jınalyp qalýy múmkin. Kúrtkelerdi búktep jınap saqtaýǵa bolady, biraq qatty tyǵyzdap tastaý usynylmaıdy. Kúrtkelerdi de aýa kiretin mata qapta saqtaǵan jón.
4. Júnnen toqylǵan jempirlerdi ár kıgennen keıin jýýdyń qajeti joq. Ony kıimge arnalǵan shetkamen tazartyp, balkonǵa jeldetip alý jetkilikti. Toqylǵan kıimderdi jıi jýsańyz, olar jyldam tozyp, túktenip, pishinin joǵaltyp alady.
5. Kúıe kóbelek kıimderińizdi búldirmes úshin 2-3 aıda bir shkaftyń ishin shańsorǵyshpen soryp, ylǵal shúberekpen súrtińiz. Sodan soń shkaftyń esikterin ashyp qoıyńyz: jándikter kúnniń kózinen qorqady.
6. Aıaq kıimdi salyp tastamas buryn ony jaqsylap tazartý kerek: tabanyn sýdyń astynda jýyńyz, ultaraqty ylǵal shúberekpen súrtińiz jáne aıaq kıimniń ústine arnaıy tazartatyn kóbik jaǵyńyz. Aıaq kıimdi tazartyp bolǵan soń, ony jaqsylap keptirip, krem nemese maı jaǵyńyz.