«Qyzyrdyń qamshysy» amaly ádettegiden erte kórinis berdi
Ótken jyly «kóktem erte keledi» dep, Batystyń búkil aqparat quraldary jamyrasa jazǵan edi. Dese degendeı, sáýir aıy shýaqty bolyp, tipti ystyq bolyp bastaldy. Áıtse de, basynda eki-úsh kún shýaqty bolǵanymen, sońy jaýyn-shashynǵa ulasty.
Almaty qalasynda da, mańyndaǵy eldi mekenderde de erigen qar sýynyń saldarynan sý tasqyny oryn aldy.
Búgin sáýir aıynyń 14-juldyzy. Aı esebinshe, aıdyń 11-i. Al qazaqy júıe boıynsha, sáýirdiń 1-jańasy. Apta aıdyń basyn da, ortasyn da, sońyn da qamtyp tur. Demek, apta qubylmaly bolýy múmkin. Paıymda aıtylǵandaı, aptanyń ár kúninde nóser, jańbyr oryn alýy ǵajap emes...
Erteń «Qyzyr qamshysy» amaly bastalady. Amal kezinde alǵashqy naızaǵaı oınap, jańbyr jaýyp, jer býsanady. Halyq osy naızaǵaıdyń jarqylyn «Qyzyrdyń qamshysy» oınady dep ataǵan. Keı jyldary bir kúndik sýyq oryn alatyn bolǵan. Kók júzin jazdyń bulty qaptaıdy. «Qyzyrdyń qamshysy» oınaǵannan keıin qys birjolata ketedi dep sanaǵan. Qazaqy paıym osylaı boljam jasaǵan.
Qazir «Otamaly» júrip jatyr. Bul amaldy Asan qaıǵy babamyz «oıylǵan qys» dep te ataǵan. Bálkim, osy amaldyń áseri me, Almatyda bıyl kún erte kúrkiredi. Naızaǵaı men jańbyr erte kórinis berdi. Órik gúlin ashyp boldy. Shıe, qara órik gúldeı bastady, arjaǵynda alma kezegin kútip tur. Ásem de arý Almatynyń alýan túrli gúlge bólenip, nurǵa kenelip turǵan shaǵy bul. Órik adam aǵzasyna asa paıdaly dárýmendi boıyna jınaǵan, halqymyzdyń súıikti jemis aǵashtarynyń biri. Asyǵys, alyp ushpa minezimen qazaqqa uqsas. Qazaqtyń minezi qyzyq qoı. Alda ne turǵanyn baıyptaı, baǵdarlaı bermeıdi. Táýekelshil halyq. Órik te sondaı, kóktem kelip, kún sál jylt etse boldy, japyraǵyn jaıyp, gúlin shashyp, shyraılanyp shyǵa keledi. Sýyqqa tez ári kóp uryndyratyn da osy minezi.
Táńirden tilerimiz – ońtústik astananyń shýaqty shaǵyn «Otamalynyń» qýatty jel-yzǵary alaı-dúleı kúıge túsirip, gúl-túınegin úsirip otap, oırandap ketpese bolǵany...
Aldaǵy aptada qazaqy paıym boıynsha, jaýyn-shashynnyń jıi oryn alýy, salqyndyq sezilýi múmkin.