Á.Qasteev atyndaǵy Memlekettik óner mýzeıiniń Ortalyq kórme zalynda Balalar jylyna oraı «Kempirqosaq» atty respýblıkalyq kórme ashylady. Bul kórme «Babalar amanaty» jobasy aıasynda Qazaqstannyń Kórkem eńbek páni muǵalimderiniń qatysýymen ótedi.
«Babalar amanaty» jobasynyń maqsaty – respýblıkamyzdaǵy búkil kórkem eńbek páni muǵalimderiniń basyn qosý, bolashaqta óskeleń urpaqtyń tálim-tárbıesi men bilim negizin ushtastyrý, sondaı-aq árqıly janrdaǵy týyndylardyń qyr-syryn tarıh taǵylymyna tereń boılata otyryp, osy ustazdardyń arqasynda kórermenge jetkizý. Bul jyl Prezıdentimiz Q.Toqaevtyń usynysymen «Balalar jyly» dep belgilendi.
Shyǵarmashylyqpen aınalysatyn elimizdiń túkpir-túkpirinen qatysatyn úzdik 80-nen astam ustazdyń týyndylary qoıyldy. Sonaý este joq eski zamannan beri kele jatqan ulttyq ónerimizdi óskeleń urpaqtyń boıyna darytyp, babalarymyzdyń kıeli ónerin ǵasyrdan-ǵasyrǵa jetkizip, tarıh betterinde altyn árippen jazyp qaldyrý – ustaz mindeti, urpaq paryzy dep bilemiz.
Bıyl «Babalar amanaty» ulttyq jobasynyń qurylǵanyna úsh jyl tolady. Jobaǵa QR Sýretshiler odaǵy, QR Dızaınerleriniń Eýrazıalyq odaǵy, Qolóner odaǵy jáne shyǵarmashylyqpen aınalysatyn Qazaqstan Respýblıkasynyń Kórkem eńbek muǵalimderi kiredi. Olar Túrkıa, Gresıa jáne Ortalyq Azıadaǵy halyqaralyq kórmelerge únemi qatysady.
Qanaǵat Kodekov – «Babalar amanaty» jobasynyń jetekshisi, kýratory, «Úzdik pedagog–2021» jeńimpazy, QR Sýretshiler odaǵynyń múshesi, «Babalar amanaty» Halyqaralyq jáne respýblıkalyq kórkem eńbek pen kásibı sýretshiler jınaǵynyń avtory. «Babalar amanaty» – Qazaqstan Respýblıkasynyń halyqaralyq kásibı sýretshileri men talantty Kórkem eńbek muǵalimderiniń úzdik shyǵarmalarynyń jınaǵy. Sondaı-aq, ál-Farabıdiń 1150 jyldyǵyna, Abaı Qunanbaıulynyń 175 jyldyǵyna, Muqaǵalı Maqataevtyń 90 jyldyǵyna, QR Táýelsizdiginiń 30 jyldyǵyna jáne t.b. arnalǵan shyǵarmalar jınaqtary jaryq kórdi.
Kórkem eńbek pánderin oqytatyn respýblıkanyń barlyq óńirlerinen kelgen 800-den astam ustaz, shyǵarmashyl pedagog «Babalar amanaty» jobasynda respýblıkalyq jáne halyqaralyq deńgeıde pedagogıkalyq ónerdi nasıhattaý maqsatynda birikti. Joba músheleri elimizde ótip jatqan mádenıet kúnderine belsendi qatysyp, kórmeler ótkizedi.
Qazirgi ýaqytta elimizdiń pedagogıkalyq qoǵamdastyǵy óskeleń urpaqty ulttyq beıneleý óneriniń qupıalary men qyr-syryna úıretý úshin tynymsyz eńbek etýde óner arqyly olardy qazirgi zamanǵy kórkemdik baǵyttarmen tanystyrady, estetıkalyq tárbıeni, sulýlyqty durys túsinýdi qalyptastyrady. Qazaqstannyń ulttyq ónerin nasıhattaý boıynsha jumys júrgizýde.
Kórmeni 10 mamyrǵa deıin tamashalaýǵa bolady