Parıj Olımpıadasyna qatysqan qyrǵyz eliniń sportshylaryna avtokólik pen qarjylaı syılyq tartý etildi, dep habarlaıdy aqshamnews.kz.
Olımpıada oıyndaryna Qyrǵyzstan quramasy sapynda 16 sportshy attanǵan bolatyn. Onyń 6-y júldeli orynnan kórindi. Osylaısha qyrǵyz sportshylary Olımpıada oıyndarynda ıelengen júlde sany boıynsha rekord jasady. 2 kúmis, 4 qola medal enshilep, jalpy esepte 68-orynnan kórindi.
Áıelder kúresinen Meıirim Jumanazarova men boksshy Munarbek Seıitbekuly kúmis júldeger atandy. Grek-rım kúresinen Aqjol Mahmudov, Jolaman Shárshenbekov, Úzir Júsipbekov jáne áıelder kúresinen Aısulý Tynybekova qola júldege ıe boldy. Meıirim Jumanazarova, Aqjol Mahmudov pen Aısulý Tynybekova ekinshi ret Olımpıada oıyndarynda júldeger boldy.
Qyrǵyzstan úkimeti Olımpıadada kúmis júlde alǵan sportshyǵa 10 mln som aqsha men kólik tartý etti. Al qola júldegerlerge 7 mln som men temir tulpar syılady. Sondaı-aq besinshi oryn alǵan Aıperi Medetqyzy (áıelder kúresi), Aıaal Lazarev, Bekzat Almazuly(erkin kúres), Amantur Ismaılov (grek-rım kúresi) 1 mln som men kólik ıelendi. İrikteý kezeńderinde ese jibergen 6 sportshyǵa 500 myń som men kólik berildi.