Almaty oblysy Qarasaı aýdany Qyrǵaýyldy aýylynyń turǵyndary aýyz sýǵa jarymaı otyrǵanyn aıtyp, janaıqaıyn jetkizdi, dep habarlaıdy Almaty-akshamy.kz.
Qyrǵaýyldy aýyly Almatynyń dál irgesinde ornalasqan. Taý etegi bolǵandyqtan osy eldi mekenge kelip, úı salyp alǵysy keletinder kóp. Biraq mundaǵy halyqtyń búginde mazasy qashqan. Óıtkeni sýarmaly sý turmaq, 5-6 jyldan beri aýyz sý da joq, dep jazdy Sputnik Qazaqstan
«Aýyl ákimdigine óz basym 5-6 ret bardym. Ol eshnárse aıtpaıdy. "Sý bolady" dep aldap shyǵaryp salady. Osydan bir jeti buryn búkil el, aýyl bolyp aýdandyq ákimdikke hat jazdyq. Búgin baryp bilsek, sol hat ákimniń qolyna áli tımegen. Ákimdikte sýdyń máselesin sheshetin adamdar "problema joq, sý bolady" dep shyǵaryp salady. Mal ustaıyq desek jer joq. Bárin satyp jibergen. Bes qıar, bes aǵashty da sýǵara almaı otyrmyz», - deıdi Qyrǵaýyldy aýylynyń turǵyny Ahat Orynbaev.
Ne kerek, munda sý tasıtyn kóligi bardyń dáýiri júrip tur. Olar Qyrǵaýyldynyń turǵyndaryna bir sısternany 17 000 myńǵa satady.
«Sýsyz otyramyz ba, satyp alyp jatyrmyz. Sýdyń joq ekenin biledi, sý tasyǵyshtar kelip bir sısterna sýdy 17 myńǵa satady. Jýynamyz, azdap esik aldynda ósirip jatqan qyzanaǵymyzǵa quıamyz, sonymen-aq 2-3 kúnde ol sý bitip qalady. 5-6 jyl buryn bir sısterna sý 4000 teńge edi, bizde sý joǵyn biletinder baǵany kóterip jiberdi», - deıdi Qyrǵaýyldy aýylynyń turǵyny Tuıaqbaı Kenjebaev.
Negizi bul jerdiń máselesi tym áride jatyr. Almatynyń irgesinen bálenbaı gektar jerdi birneshe jyl buryn satyp alǵan kásipker ýaqyt óte kele, ony turǵyndarǵa sata bastaıdy. Jekemenshik satqan jerde ınfraqurylymǵa jaǵdaı qarastyrylmaǵan. Qońdy jer dep qonys teýip, bórkin aspanǵa atqandar arada 3-4 jyl ótken soń aýyz sýdyń azabyn tarta bastaıdy. Ol ol ma, tipti elektr baǵanalary men joldy da turǵyndar qaltasynan qomaqty qarjy shyǵaryp jasaıdy.
Sýdy aıtyp halyqtyń shýlaǵanyn estip, aýdandyq ákimdiktiń mamandary taıly-tuıaǵy qalmaı jınaldy.
«Bul jer jekemenshiktiki bolǵan, jaqynda ǵana aýdan ákimdiginiń balansyna ótti. Iá, aýyz sý máselesi bary ras. Bul jerde bir ǵana sý tartqysh qondyrǵy bar. Aýyl kólemi ulǵaıǵandyqtan onyń shamasy aýyz sýmen tolyq qamtýǵa jetpeıdi. Biz ekinshi sý tartqysh qondyrǵy ornatamyz. Jaqynda ǵana sol qondyrǵyny ornatý úshin baıqaý jarıaladyq. 15 shildeden bastap qurylys montaj jumystaryn bastaımyz. Buıyrsa qazan aıyna deıin ekinshi sý tartqysh qondyrǵy ornatylyp bitedi dep josparlap otyrmyz», - deıdi Qarasaı aýdany ákiminiń orynbasary Márlen Qasenov.
Qarasaı aýdany ákiminiń orynbasary Márlen Qasenov © Sputnik/Ertaı Sarbasov
Alaıda qyrǵaýyldylyqtarǵa alaıqaılap qýanýǵa erte. Óıtkeni eki birdeı sý tartqysh qural ornatqannyń ózinde búkil aýyldy sýmen qamtı almaıdy, tek aýyz sýǵa jetýi múmkin. Al sýarmaly sý áli de turǵyndardy tyǵyryqqa tiremek. Óıtkeni Qyrǵaýyldyda aryq qazatyn da jer joq. Saldarynan halyq aǵashyn sýǵara almaı otyr.
«Kezinde jekemenshik adam satqandyqtan ınfraqurylym esh oılastyrylmaǵan. Bul jerde halyqtyń da kinási bar. Jerdi alar buryn bárin zertteý kerek edi. Endi ákimdikke de, halyqqa da bul problema týdyryp otyr. Aryq qazý boıynsha da qosymsha jumystar jasalady. Ony halyqpen birge júrip, aýyldy aralap, sheshemiz», - deıdi aýdan ákiminiń orynbasary.
Aıtpaqshy, Qyrǵaýyldy aýylynyń turǵyndary másele 2-3 kúnde sheshilmese, Almaty mańynda jańadan ashylatyn BAKAD jolyn jabamyz dep dúrlikken bolatyn. Alaıda bıliktiń ýájin tyńdaǵannan keıin taǵy da sabyr saqtaýdy jón kórip otyr.