Nýtrısıolog Laýra Seıitbek óziniń ınstagram paraqshasynda quıryq maıdyń paıdasy jaıly jazdy, - dep habarlaıdy Almaty-akshamy.kz Massaget.kz-ke silteme jasap.
Dáriger baıaǵyda úlken kisiler quıryq maıdy jıi qoldanatynyn aıtyp, bala kezin eske túsirdi.
«Bala kezde sýyqtap aýyrsaq, apamyz quıryq maıdy jylytyp ashqarynǵa jegizip, sońynan ystyq sút ishkizip, maımen arqamyzdy sylaıtyn edi. Sodan keıin óńeshiń jumsaryp, janyń raqattanyp, uıyqtap ketkenińdi baıqamaı qalasyń», - dep jazdy ol.
Biraq qazir kópshilik ony qoldanbaıdy.
«Al qazir qoıdyń maıy holesterın mólsherin joǵarylatyp, júrek-qan tamyrlar aýrýlaryna ushyratady dep, sonaý ata-babamyzdan qanymyzǵa sińgen úırenshikti astan bas tartqyzyp, avokado, rýkkola, maısyz et dep ártúrli ónimderdi usynyp jatyr. Olardyń baǵasy da qymbat», - dedi maman.
Nýtrısıolog Laýra Seıitbek quıryq maıda paıdaly maı qyshqyldary bar ekenin jazdy.
«Al shyndyǵynda, quıryq maıdyń paıdasy kóp. Onyń quramynda aǵzaǵa paıdaly maı qyshqyldary (lavr, stearın, oleın, palmıt jáne t.b) bar», - dedi ol.
Mamannyń aıtýynsha, bul qyshqyldar mynadaı qasıetterge ıe:
Oleın qyshqyly - júrek-qan tamyrlar aýrýlarynyń aldyn alady. Ol joǵary temperatýraǵa tózimdi ári adam densaýlyǵyna zıandy maı qyshqyldaryna ydyramaıdy.
Stearın qyshqyly - erlerdiń jynystyq belsendiligin arttyryp, qaýipti isiktiń aldyn alady. Ári bul qyshqyl adam aǵzasyna ýly emes.
Odan bólek onda myrysh, magnıı, selen, fosfor, natrıı sıaqty bala aǵzasyna aýadaı qajet mıneraldarǵa baı.
Olardyń mynadaı paıdasy bar:
- asqazan-ishek joldarynyń qyzmetin jaqsartady;
- ótti suıyltyp, ót qyshqylynyń jaqsy bólinýine járdemdesedi;
- aǵzada jańa gormondar túzedi;
Dárigerdiń aıtýynsha, quıryq maıdy qaınatsańyz da, qaqtasańyz da óz quramyn buzbaı, paıdasy saqtalady.