Teatr keńistigindegi ózindik aıryqsha baǵyty men orny bólek Almaty Memlekettik qýyrshaq teatry 1 qazanda Bolgarıa Respýblıkasynyń Varna qalasynda ótetin festıválge attanady.
Úsh jylda bir ret uıymdastyrylatyn eń bedeldi teatr festıválderiniń biregeıi - XVII Halyqaralyq «Altyn delfın» qýyrshaq teatrlar festıvalinde óner kórsetý – bir beles. Óıtkeni, teatr ujymy atalmysh festıválge álemniń 38 elinen 135 óner mekemeleri usynǵan 160 ótinim arasynan iriktelip otyr. Festıválde Bolgarıa, Italıa, Qytaı, Ońtústik Afrıka, Túrkıa, Qazaqstan Respýblıkalarynan - barlyǵy 14 teatr ujymy dodaǵa túspek, dep habarlaıdy Almaty-akshamy.kz
XVII Halyqaralyq «Altyn delfın» qýyrshaq teatrlar festıvaline Almaty Memlekettik qýyrshaq teatry álem dramatýrgıasynyń «koroli» sanalatyn Ýılám Shespırdiń áıgili «Romeo men Djýletta» týyndysyn qýyrshaqtar beınesinde usynbaq. Shyrǵalańǵa toly mahabbat, óshpendilik, saǵynysh pen batyldyqty zamanyna saı túletken qoıylymnyń rejıseri – Dına Jumabaı. Sýretshisi – Iýlá Chernova, baletmeısteri – Anna Soı, qýyrshaqtardy jasaýshy sheberi – Nıkolaı Proskýrın. Sulýlyqqa súısinýden, adamnyń ulylyǵyna degen senimnen jáne onymen ómirde qýanyshty bólisýge tyrmysýynan týyndaǵan spektákl adam boıyndaǵy qandy kek pen qyzǵanyshty, menmenshildik pen pendeshilik syndy qasıetterdi jeńgen móldir mahabbat týraly baıandalady.
Óner ujymdarymen shyǵarmashylyq baılanys ornatyp, kásibı biliktilikti shyńdap, tájirıbe almasýdy negizgi maqsat sanaıtyn Almaty Memlekettik qýyrshaq teatry aǵymdaǵy jyly Koná, Aqtóbe, Almaty, Oral, Aqtaý qalalaryndaǵy Halyqaralyq deńgeıdegi 6 festıválge qatysyp, júldeli oryndarǵa ıe boldy. Aldaǵy ýaqytta sheteldik jáne otandyq 4 festıválge qatysqaly otyrǵanyn da aıta ketken jón.
Teatr talanttary tartysqa túsetin alaman báıgede oza shabady degen senimdemiz!