Jahan jurtyn tamsandyrǵan Dımash Qudaıbergen óneri arqyly Qazaqstandy álemge tanytyp qana qoımaı, el ekonomıkasyna da tabys ákelip otyr - ekonomıs, qarjygerler.
Ánshiniń Almatydaǵy shoý konsertine 6 myńnan astam sheteldik meıman kelgen. Olar alyp shahardyń ásem jerlerin aralap, qazaqtyń salt-dástúrimen tanysty. Estelikke ulttyq naqyshtaǵy kádesyılar men ánshi beınelengen syılyqtar aldy, dep habarlaıdy Almaty-akshamy.kz.
Norma Chaves - Dımashtyń Amerıkadan kelgen jankúıeri. Qazaqstanǵa alǵash ret taban tireýi. "Stranger" konsertinen alǵan áserdi sózben jetkizý múmkin emes", - deıdi ol. Osy saıahatqa bas-aıaǵy 5 myń dollar jumsaǵanyn aıtady.
«Dımashtyń keshine afısha shyqqan kezde birden konserttiń jáne ushaq bıletin satyp aldym. Qonaq úı tańdadym. 20 qyrkúıekte Almatyǵa keldim. Sol ýaqyttan beri qalanyń biraz kórikti jerin araladym. Qarjymnyń kóp bóligin qonaq úı men bılet shyǵyndaryna jumsadym», - deıdi AQSH-tan kelgen Dımashtyń jankúıeri Norma Chaves.
Bul rette, konsert aldynda qaladaǵy 4-5 juldyzdy qonaq úılerdiń kóbi lyq toldy. Aýqymdy keshtiń arqasynda osy salaǵa da biraz kiris kelgeni jasyryn emes.
«Stranger» konsertine álemniń 68 memleketinen 6 myńnan astam týrıs kelgen. Olardyń basym bóligi toqtaǵan. Almatydaǵy 4-5 juldyzdy qonaq úılerdiń ortasha baǵasy táýligine 40 myń teńgeden asady. Konsert bıletteriniń quny 8 myńnan bastalyp, 40 myńǵa deıin jetti. Sheteldikter shahardyń kórikti jerlerin tamashalady. Ekonomıserdiń esebinshe, Almatyǵa sapary kezinde bir týrıs kemi 1 myń dollar jumsap, qala búdjetin aıtarlyqtaı tolyqtyrdy.
«Týrıserdiń birinshi kezekte paıda keltiretin salasy - ol qonaq úı, qyzmet kórsetý salasy. Pandemıadan keıin bul salalar bizde qınalyp qalǵan. Osy Dımashtyń konserti sıaqty álemdik dárejedegi konsertterdiń uıymdastyrylýy bul salaǵa qosymsha dem beredi dep aıtýǵa negiz bar. Dımashtyń konsertine kelgen azamattar dollarmen keledi. Olar eýromen keledi. Onyń bizge paıdasy da óte joǵary, sebebi, shetelden kók qaǵazdyń kelip jatqany teńgeniń turaqty bolýyna belgili bir dárejede úlesin beredi dep aıtýǵa negiz bar», - deıdi ekonomıs Maqsat Halyq.
Mýzyka, kıno, dızaın, jarnama, sán bıznesinen elge keletin tabysty kreatıvti ekonomıka deıdi. Bul salalarda Qazaqstanda 285 myń adam eńbek etip júr. Al belgili sarapshylar álemdi ánimen terbegen Dımash Qudaıbergendi ulttyq kompanıalar sıaqty ekonomıkaǵa orasan zor paıda ákeletin brendke aınaldy dep otyr.